為了實現媽媽遺願，我成為了女兒國唐僧: K295

雖然我哋三個都知QQ係講笑，但我一樣擰塊面去幽蘭…
V：「如果佢唔借畀你，我都一定唔會借畀你，死心啦。」好一個姐妹情深，真係想掉妳哋入個丼入面。
鄧：「今日嘅課文就講到嚟呢度啦，係嘞，我想要你哋做下說話練習，但係又唔想用返啲標準題目嚟做測試咁悶，所以呢，我想你哋試下做口譯小說，即係搵本比較多對話嘅小說，然後將某一段用口語演繹返出嚟，無論係中文小說定係外國著作嘅中譯本都可以嘅，最緊要係近代書面語，唔好同我搵啲古文或者網絡粵文小說嚟做材料呀下，我希望可以兩至三個人一組，因為太多人就會有人唔講嘢，每個人要講分半至兩分鐘，用你哋嘅方法錄音交mp3檔，同埋我需要一份口語嘅書面譯本用嚟對照原文…」
「Miss，咁啲口語我哋點寫呀？又話無標準？」
鄧：「基本上係無，用返你哋嘅常識嚟寫就得，你哋WhatsApp都係咁打㗎啦，唔好搵啲古文死字寫畀我睇，或者你哋可以參考一下中大呢個粵語字詞資料庫…」
呢啲時候，大家唔係最關注份功課點做，而係點分組…
雖然我同QQ住埋一齊，但我更加要避嫌唔好乜都黐埋落去佢度，加上而家呢班我唔係最親近佢嗰個…YY先發制人擰個頭嚟後面望一望左右女神，以迅雷不及閃電嘅速度達成一致共識，再望一望後面兩個，明顯地U同Z即刻用一個可以自己搞掂嘅眼神嚟回應。
算啦，我都係搵返自己親信，但當我一咁諗嘅時候思韻已經比我快一步出手跨過條走廊換嚟阿健嘅哦一聲。
我：「喂，加埋我得唔得呀？」
健：「吓…但係佢已經搵埋呀朱一組喇喎。」




屌，兩個人一組都得，咁你抽返出嚟同我一齊咪得囉，由得佢哋兩個…我當然就唔好意思咁講啦；而慢人幾拍嘅細龜聽到呢個消息先恍然大悟自己個大佬已經俾個港女搶走咗，唯有死死氣咁望住我。
我：「得喇，我會同你一組，唔使咁望住我…」
龜：「唔該。」其實得我同佢嗰陣係會多啲嘢講，但始終呢個斜角左右就已經係兩個女神喺度…
我：「不過得我同你兩個都唔知有乜嘢可以講…」
龜：「我同意。」
我：「靠你寫稿喇，你成績好過我。」
龜：「吓，我識計數咋，中文合格多啲。」
我無言以對，一副天有絕人之路嘅眼神望住條死宅男。