為了實現媽媽遺願，我成為了女兒國唐僧: K293

U：「哎吔，咁樣先最方便睇同實用吖嘛，字體嘅大細同埋字型都較到最好㗎喇，而且用埋顏色嚟代表男女同學，重有埋學號添，啲班會主席囉，開咗幾日學都重未收班會費，個座位表係VA室借卡紙零成本整出嚟㗎。」
鄧：「唔係成本問題，而係個感覺好似好刻板…」
U：「如果Miss妳想我喺個背景上面畫塊草地咁老套都唔係一個問題嚟嘅。」教著呢啲學生都唔知係咪好事。
鄧：「咁我而家諗下點調位啦，至於乜班會費嗰啲…自己搞掂唔好煩我。」然後佢企起身俯視眾生規劃藍圖。
又走咗埋嚟望一望我冷笑…做乜啫，好心Miss妳就睇路啦，我同邊個坐都得嘅，妳顧掂其他重點麻煩人物先…
之後佢又走咗去右上角叫個同學起身，自己坐咗落去，一早就話咗呢個班主任係嚟攪笑，大家都唔知佢做乜鬼…
我：「Miss…班主任節雖然唔使妳有乜建樹啫，都唔使霸咗同學個位嚟吞泡㗎…」
鄧：「乜呀，我只係喺度研究呢個位係咪睇黑板好辛苦咋。」攪笑…企喺側邊都知啦，使鬼坐落去感受咩。
我：「唔通妳要搵個最差嘅位安放我落去？定係諗住學演唱會分區劃位等我哋搶飛炒黃牛？」
鄧：「呵，知驚喇咩，等你開心咗咁耐吖嗱。」




我：「嗰個位唔差㗎，你望唔到人嘅時候人哋就都望唔到你，先生通常留意唔到所以喺個位做乜都得。」
鄧：「你放心啦，我一定會安排個好位等科長你可以專心上堂。」
之後就打鐘Miss走人，到佢再返嚟嘅時候已經係lunch前嘅中文連堂，亦都係調位時間所以大家已經執定晒包袱…
鄧：「大家都大個仔大個女喇，所以我唔想啲位好似以前咁悶。」不如話佢終於有得教高中自己喺度貪玩…
鄧：「由於我哋有三十四位同學，為咗避免最後排嘅同學太過凋零，所以我想調整一下每排嘅人數。」
據我估計咪將第一排或尾二排搬一兩pair落去。
鄧：「所以我想五排嘅人數係六七七七七。」
U：「但Miss…咁樣每排七個嗰啲就會有單丁，會唔會唔係幾好？」我知有啲低form會轉做一二二二一嘅排列，用意就係安放啲好嘈或自閉嘅同學喺邊位，同埋可以令條走廊闊些少，有好有唔好啦，如果有幾個單丁我都唔介意自己係其中一個，只要係喺窗口嗰邊。
鄧：「唔會嘅，因為我想轉做二三二排列，咁樣就更加似專上學院嘅格局，嗱，我已經幫你哋排好晒喇，首先要你哋夾手夾腳搬好啲枱凳，一set吉嘅就推埋去門口靠牆…」
今次就真係調位咯，平時其實只係調人，而家所有枱凳兼走廊位要郁晒，再加埋我哋啲個人物品，你話幾咁亂…搬到咁上下已經有啲人要企晒喺度或者坐喺側邊枱面。




鄧：「唔該晒各位同學，而家就順住學號攞位啦。」
一號出去望咗一陣，埋位前望咗一下我，攪乜？而之後出去嘅同學都有類似嘅舉動，直至到我呢個十一號望見…