為了實現媽媽遺願，我成為了女兒國唐僧: K290

Sorry，係我先入為主咁劣化咗佢哋，人哋分分鐘處女嚟…
至於左女神又係一個奇葩，超富家女再加精神病。
簡單咁食完晚飯之後，又係我哋兩個準備開工嘅時間。
今日星期日聽日要返工返學，好多人唔會玩到咁盡所以十一點半多啲就已經走得，兩個鐘到就搵到成二百蚊其實都幾好賺，係有時可能未必比得上QQ嘅直播。
今日返到去佢都重喺度打緊，我本住唔會打攪佢搵錢嘅原則所以係唔會八掛佢嘅，除非有嘢要我幫手啦。過咗十二點佢就熄cam落播然後check返下啲戰績業績同熱度…
Q：「哎，不如你去睇下健仔啲歷史數據吖。」
我：「佢打得好差？做唔到效果出嚟？但你叫我睇未必有用㗎喎，我認我而家真係渣過佢一截。」
Q：「唔係，可以話重勁咗，但出手有啲狠得滯…叫你睇就睇啦，如果你發現到啲乜先再繼續同我討論。」
佢叫到我當然即刻開嚟睇啦，基本上都係贏多輸少大概二一比，發育良好人頭都攞唔少確實符合打野嘅要求，轆下轆下都唔覺戰績有乜大差池…咦？！
我：「乜話？！佢呢兩日同欣姐打咗四五十場？」




Q：「係，即係我無記錯名啦，當一場要十五分鐘即係佢哋呢兩日相處咗十粒鐘有多，而且平日夜晚都有打。」
呢條契細佬…唔怪之得呢兩日完全無搵過我。
我：「咁妳有乜嘢睇法？」
Q：「無，得個知字，我無興趣干涉其他男仔嘅私事，只要佢幫到我就會繼續搵佢幫手，就算有一日佢唔再幫到我都會當返佢朋友嘅，你又有無高見？」
我：「無呀…識到女仔對佢嚟講會係一件好事？畢竟佢以前咁恨，但係我覺得人哋堂堂大學生點會睇得上佢。」
Q：「未必㗎，你諗返佢以前對住Kuromi唯唯諾諾個樣而且重要想大獻殷勤咁，女仔就算唔心動都可能會受。」
我：「唔使講以前，佢而家對住妳都重係唯唯諾諾。」
Q：「點同，以前嘅原因係佢覺得我係佢心儀嘅可愛妹妹仔，而家係因為我有錢畀返佢同視我為女神。」
問你死未，女神嘅霸氣就係講呢啲說話都唔會面紅。
Q：「你覺得佢今次會唔會又搵你做軍師教佢溝女？」




我：「唔會掛…畢竟我上次攪到佢雞毛鴨血，見過鬼就唔好再搵我啦，我都唔鬼想幫佢，因為好鬼麻煩。」
Q：「我都咁話，佢唔出聲嘅話當乜都睇唔到好過，不過你都幾無用㗎喎，人哋就有收獲，點解你乜都無咁慘慘豬嘅，明明嗰晚就有兩個姐姐喺度。」