為了實現媽媽遺願，我成為了女兒國唐僧: K288

Q：「梗係高過啦…揸巴士加下班就大概中位數兩萬。」
我：「咁…起碼唔使餓死老婆瘟臭屋？」
Q：「唔得閒理你呀！你鍾意就全日放假匿喺屋企玩揸貨櫃車鍛煉技術啦，唔關我事！」講完佢就出咗門口。
唉，有時都唔明白QQ想點，係嫌我太廢無可能配得起佢？定係真心為我設想希望我搵到條好嘅出路？我都唔想㗎，雖然已經勤力咗少少讀書，但要追上妳哋又談何容易喎，連我都說服唔到自己喺香港呢個商業世界我有乜嘢係可以做得比QQ出色，我係老細都識請人啦，請妳做嘢又得，請妳做花樽亦得，得咗。
貨櫃車司機…都叫正當穩定職業…我老竇就話如果肯行船嘅話就實隨時都有得做…我剩係知我無可能成世都喺酒樓入面打工，QQ一定會覺得我係廢柴睇我唔起…
嗚嗚，我只係想做細路仔，我識整嘢食畀自己兼喂埋妳其實好叻㗎喇，點解要我諗咁多呢啲嘢喎。
結果我真係開咗轉貨櫃車由英國踩去土耳其…
結果未夠六點佢就返到嚟，當然啦，有專車接送而且人哋個女都要返屋企交人，我望一望個心嘩一聲叫咗出嚟。
以車嚟比喻，普通人只會定期去洗車，佢呢隻直頭係重新焗漆加打埋蠟，兼且上埋防護coating。本身佢已經一頭秀髮，而家直嘅地方更加直，該曲嘅地方更加曲，每條頭髮都好似平行線咁，亮麗得嚟又唔會係覺得油嗰隻死角反光，而係每個位置同角度都有柔和嘅光線反射出嚟咁；頭髮嘅長度無乜點變，但就更加有層次，唔會一下睇晒好似可以俾你慢慢探索咁，所以話女仔外表要keep得好，除咗天生麗質係必需之外後天嘅課金都係好重要…
我：「嘩，女神今次又升咗lev喇。」




Q：「大驚小怪，今時今日只要有錢個個女仔都可以執。」我明嘅，或者細蚊都可以泵到變大蚊嘅道理…
我：「讚嘆嘅說話我慳返喇，係想八下整到咁要幾銀？」
Q：「水療順直護理加埋洗剪吹造型…一千五百幾，其實呢間唔算太貴㗎喇，而且手工重好好。」
我：「見到妳個樣咁開心都覺得值回票價嘅。」
Q：「嗯，而且髮型師哥哥好靚仔，洗頭姐姐好靚女。」
就等於去餐廳食嘢都要畀錢落去啲裝修料度…
我：「真係要多謝晒左女神對妳咁好。」
Q：「同人哋好熟嗱？咁快就封號畀人哋。」
我：「唔關熟唔熟事喇…係妳第一日已經教曉我，因為妳坐我右手邊所以係右女神，咁佢而家坐我左手邊咋嘛。」
Q：「乜第一日呀？！嗰陣我同你已經坐咗個幾禮拜！」




我：「再以前嘅我唔記得喇，我永遠當嗰日係day1。」
Q：「再之前…你咪剩係識用鄙視同鹹濕嘅眼神望住我，咁而家Yvonne係咪你前女神呀？」