為了實現媽媽遺願，我成為了女兒國唐僧: K283

我：「吓，咁空泛，或者攰得滯瞓咗喺個三唔識七嘅男仔嘅膊頭上面都得㗎喎，呢啲小事話唔記得咗都得啦。」
Q：「佢先唔傻，講少少就係想戳我自爆多啲畀佢聽。」
我：「唓，無證無據佢講乜都得啦，不如話妳坐喺我大髀上面瞓。」
Q：「話唔埋㗎…我唔知佢兄弟睇到幾多，會唔會影低咗我哋，所以我先至喺度煩緊。」
我：「地鐵車廂係公眾場合嚟，我哋都做唔到啲乜啫。」
Q：「我記憶中你有搭住我膊頭，其他就應該無。」
我：「咁妳賴晒落我度咪得囉，我係衰人男同學，趁妳攰得滯就借啲意博懵，乘機抽水…咁佢…而家點呀？」
Q：「佢見我支吾以對咁，咪喺度發緊脾氣囉。」
我：「咁妳又有乜打算，等佢自己嬲完？」
Q：「邊有咁易呀…等佢攤多兩粒鐘先掛。」




我：「如果攪到散咗，妳會有乜打算？」
Q：「可以有乜打算，搵過第二條仔囉。」呢個女神真係冷酷，睇怕佢條仔喺佢心入面都係屬於可置換式…
我：「唔通妳已經一早有預備位置俾第二條仔無縫？」
Q：「無喎，我唔會做埋呢啲浪費自己精神嘅事情。」
我：「如果調返轉係妳發現佢喺車廂入面俾其他女仔挨住瞓，妳又會點？」
Q：「無乜點㗎喎，但可唔可以唔好俾我睇到得唔得？日日對住你重點會唔知男仔諗緊乜吖，如果佢搵到第二個好女仔，我就自然會無行㗎啦，但如果佢都係玩下，唔影響佢以後點對我嘅話，咁不如唔好俾我見到算。」
我：「咁如果佢好有技巧咁一腳踏兩船呃妳呢？」
Q：「哈，先唔理佢可以點樣呃到我，就算佢唔精盡人亡都會銀包盡人亡啦，你估佢真係好多零用錢咩。」
我：「言下之意…係咪有錢仔就可以打橫行嚟溝女？」
Q：「你咁講錯唔晒嘅，男人有無錢都花心㗎啦，只不過窮人無資格去做壞事咋嘛，唉，而家係我唔想嘥精神去理佢呀，我重有正經事要做，好鬼麻煩。」




根據我同佢嘅約定，佢同男朋友係點我完全唔會干涉，所以得個知就算，對我嚟講最重要係知道佢條仔係吃貨男友就夠，只要佢哋唔係日日喺度愛到死去活來，我相信終有一日可以等到機會嘅。話就話想佢哋嗌架嗌到散，但睇住QQ一頭煙咁其實我都唔係幾好受，我覺得最理想嘅情況就係佢條仔搵到第二個然後閃撇QQ，我諗佢都唔會太傷心㗎啫，聰明嘅小朋友梗係識得趁後生玩多幾個㗎啦。
放咗工，返到屋企喺門口就聽到QQ吱吱唚咁講電話，所以我勁細力咁打開鐵閘同埋木門，因為理論上呢啲聲係唔會出現喺佢豪宅間房入面嘅。
本來我係應該去沖涼先，但我忍唔住就坐喺床度偷聽。