為了實現媽媽遺願，我成為了女兒國唐僧: K275

我：「但都未必係一件壞事嚟嘅，好多男仔都係衰人嚟，接近妳係為咗做埋啲烏喱單刀嘅嘢㗎咋。」
V：「咁唔通…你就好似Queenie所講係一個衰人嚟？」
我：「以前係㗎，衰到爆添，而家都唔見得係好人嚟。」
V：「我先唔信呀，佢精過鬼又點會留喺個衰人身邊。」
我：「有可能佢都好衰，我哋臭味相投，一物治一物。」
V：「如果係咁，我同佢重可唔可以繼續玩得嚟，佢會唔會只係同我扮friend㗎咋？」
我：「信佢啦，佢實畀到個答案妳，要有啲信心，我覺得妳唔使諗太多轉變上嘅嘢，由得佢就會無問題。」
V：「我好驚有一日佢離我而去，你都會唔再理我。」
我：「如果佢咁衰，我會睇唔起佢，唔理佢而理妳。」
V：「講吖你，肯定係大話嚟，你喺佢面前邊有得揀。」




我：「點會呢，我哋一齊住咋，互不干涉嘅，佢拍拖我都唔會理佢，由得佢協助及教唆他人犯法，而我亦都一直自由自在，想做乜就做乜。」
V：「咁不如你唔好做佢隻兵，剩係做我隻兵吖？」
我：「乜喎，我邊係佢隻兵…同埋妳好想收兵咩，妳嘅話好易㗎咋，來者不拒就得…好似男班長嗰啲咁呢。」
V：「唔得喎，我對佢無乜好感，Queenie揀得嘅嘢一定係最好嘅，如果你同佢真係無關係就做我隻兵啦。」
我：「我同佢咪普通朋友…妳都係我嘅朋友嚟。」
V：「點解佢係普通？我就係唔普通嘅朋友？」
我：「唔係…我意思係妳唔使誤會我同佢有乜特別啫。」
V：「係呀，咁佢同你一齊住有無惜過你？唔准講大話呃我㗎。」
我：「呢個…就有嘅，不過唔係嗰啲意思，佢應該係想多謝我啫，例如煮完飯畀佢食就會走嚟輕輕惜我一啖，或者妳當我哋係屋企人會比較貼切。」頭先佢喊完之後就一直依偎喺我嘅身邊，我亦都用左手攬住佢左邊嘅膊頭，溫柔咁順捋佢啲又長又滑嘅秀髮，可能你會覺得我唔應該同一個啱啱識嘅女仔行到咁埋，但對我嚟講其實又好平常。
我：「妳…妳做乜…」佢貼咗塊面埋嚟偷襲咗我一啖。




V：「我學Queenie咋，咪多謝你喺度陪我，等我唔使食啲死人藥。」
我：「點…點得㗎，呢個…唔係妳嘅初吻嚟咩？」
V：「梗係啦，我讀咗九年女校邊有機會掂男仔喎。」
我：「咁妳做乜惜我，我負責唔起㗎…」
V：「你梗係負責唔起啦，我自己都負責唔起自己嘅生命，實在係太過沉重喇，不過你咁老套㗎，都廿一世紀重喺度講初唔初吻，肯定係有處女情意結嗰啲衰人嚟，講，你係咪喺度諗緊我係一個好乾淨嘅處女嚟？」