為了實現媽媽遺願，我成為了女兒國唐僧: K273

好彩呢度真係無人，如果唔係真係會嚇死人，俾先生見到嘅話可能會以為我非禮甚至強姦埋佢都似。
V：「咦…點解…滴水嘅？」佢摸摸自己額頭。
我：「見妳咁…唔開心…陪妳…」
V：「邊有唔開心喎…我只係想喊咋嘛…」
我：「一個人開心…會喊嘅咩？」
V：「你唔覺得可以盡情咁喊係好舒服好開心㗎咩？」
模糊嘅視線加埋昏暗嘅燈光，令我只係隱約咁望到佢嘅輪廓，但我知道佢塊面肯定同我一樣咁亂七八糟。
我：「我唔反對妳咁理解嘅…」雖然我覺得好矛盾。
V：「點解你喊可以一啲聲都無嘅？」
我：「我媽咪…喺我好細嘅時候就走咗，之後就由婆婆帶大我，有時諗起媽咪就會好唔開心，但係如果我喊嘅話就好似成日提住婆婆佢個女已經死咗呢個事實，所以盡可能我都唔會喊，或者只會半夜喺張被入面…就算濕咗，婆婆都只會以為係我熱得滯瞓到出汗。」




V：「咁你而家唔使擔心，可以盡情喊喇。」佢講完就攬返我個頭入去佢心口入面…我開始理解到佢係精神病。
我：「呀，唔好啦，唔可以咁㗎。」我捉住佢腰坐返正…
V：「啊，點解唔好呀？」
我：「因為妳係女仔嚟囉，唔可以調返轉㗎。」
V：「點解唔得喎，使唔使我分啲藥畀你食？」
我：「唔使，我無事，只要我知道妳都無事就得。」
V：「我都唔知自己有無事，或者你可以幫手睇住我…係呢，想問下…你會唔會有煙㗎？」
我：「我…真係無呀，雖然我唔係特別乖…但我唔食煙，妳嘅話…應該唔會食煙呀？」
V：「無就算啦，今年年頭我識咗個女同學，本身我同佢唔熟㗎，喺我俾人杯葛嗰陣佢有時會望住我，初頭我以為佢想笑我抵死終於有今日…佢喺學校俾人恰咗足足三年，佢唔係靚女，亦都唔係靚仔，屋企勉強住到居屋一直都埋唔到堆，亦可能無乜錢同其他人去玩，後尾佢有時會一兩句咁同我講下嘢，今年五月嗰陣有一日佢約咗我放學上去天台，原來就係為咗話我聽佢會轉校，連大考都唔等埋就走，嗰陣先知佢會偷偷上天台食電子煙，重俾我試咗幾啖…不過我之後都再無機會試。」
我：「我…明嘅，每間學校都會有呢啲同學，但係…食煙會臭㗎喎，妳明明就咁香，同埋如果俾其他女仔知道…」




V：「係嘅…但我都無其他途徑發洩。」
我：「發洩有好多種方式嘅，我相信有效過食煙好多。」
V：「咁你唔開心嘅話，會點樣發洩出嚟？」
我：「細個嗰陣咪成日同人打架囉…」
V：「你覺得同人打架會健康過食煙咩？」