為了實現媽媽遺願，我成為了女兒國唐僧: K269

「好啦，相信各位同學而家都refresh返點打bridge，新學嘅都有個概念，不如就分組大家都玩下啦，主席同呢位女同學可以喺隔籬輔助下佢哋，咁如果同學無問題嘅話可以簽名入會順便收埋會費，只係十蚊咋。」
因為幽蘭嘅存在，今年大家都無睇睇下走咗去，有幾位高form生可能收到風又走埋嚟玩，連啲form1妹妹都坐低認真嘗試橋牌嘅樂趣，主席亦都好順利搵晒人簽名收錢。
我：「計分好攰呀，我想玩返傷心小棧多啲。」
V：「你試下攞住葵扇Q睇下重會唔會咁講。」
呢條女果然係乜都識玩，睇怕普通嘢係唔會難到佢。
我：「加多揸紅心咪得囉，等對家以為我投降。」
V：「你估真係咁易就可以豬羊變色咩，你又咁是但…」
我：「欸…係嘅，但妳頭先真係打得好好，我係頭一次打橋牌有咁舒服嘅感受。」
V：「傻瓜，贏嗰兩三磴就咁開心，本來有兩round可以成局嘅都無成到，如果打比賽一早就輸到一敗塗地喇。」
我：「其實我唔識計分，乜嘢叫做成局呀？」




V：「有局我開2spade，你明明揸住十幾廿分，如果轉做3NT或4spade咪可以成局囉，差好遠㗎。」
我：「咁我見2spade一定贏嘛，而且我想做夢家咪pass囉，其實差一磴可以差幾遠？」
V：「你夠分又想做夢家可以開3spade等我再加嘛…差一磴差幾遠，你可以諗成…有兩個男仔同一時間追緊一個女仔，而個女仔覺得兩個都可以考慮，呢round到你約佢去咗行街食飯睇戲重送埋人哋返屋企，點知就係唔敢表白，諗住留返下一次先，結果個女仔就俾另一個男仔半推半就咁捉咗上房推埋落床，從此以後同你講再見嘅概念。」
我：「呀女神，點解妳形容得咁活靈活現嘅…」
V：「因為…以前有啲女同學都係咁嘅款，成日喺度曬命，問啲姐妹揀男拔好定喇沙仔好。」
好彩QQ唔係呢啲女仔，就算佢唔諗住揀我都好，都唔會手上面揸住成堆仔心猿意馬揀來揀去。
「各位同學，今日嘅迎新環節就嚟到呢度啦，記住平日嘅聚會時間係星期三放學喺返呢度，考試週前一個禮拜暫停，希望多啲見到大家啦，我都要走先。」
通常教理科啲先生都唔太鍾意social，霸住個學會總叫做有啲職務，只要搵到十幾廿兩友參加又無投訴就可以俾學校煩少啲，自己得閒嚟坐平粒鐘就搞掂。
席：「Vienna妳玩得咁好，不如入埋嚟做幹事吖。」