thriXt Qantasy 純文字安眠之作 (New: - U2K - 一直上架): K260

我：『幻想下就係人都有，我諗學校大把人會咁諗。』
Y：『如果有朝一日係咁，唔該留返個建寧公主畀我。』
姐姐真係姐姐，呢條女確實比起大卡車有過之而無不及。
同QQ簡單食過晚飯，我又如常出去搵阿健一齊跑步，成個暑假日子有功而家已經好少見佢氣來氣喘，可以自己調節速度跑成四五k先抖一抖，即係我當然都可以啦。
健：「點解你第一日就可以同Vienna撈到咁熟嘅？」
我：「因為坐隔籬，同埋因為有佢好朋友喺度。」
健：「如果佢單身嘅話，你覺得你有無機會變節？」
我：「你講乜吖…佢兩個無論邊個我都高攀唔起，同有無男朋友亦無乜關係，不過同Queenie一齊住就點都唔同啲嘅，無得咁樣比較，而且幽蘭佢真係單身。」
健：「你覺得佢嘅出現對你同Queenie嘅關係嚟講係一件好事定係壞事？」
我：「好壞都唔到我控制，最緊要…係佢兩個開心啫。」




休息途中，我哋又會好無營養咁吹下水同轆下電話。
健：「呀，都差唔多，不如跑埋返屋企就算咯。」
我：「吓，你唔係一定要跑夠十k唔攰死唔走嘅咩？」
健：「聽日好歹都試閘，留返少少力咁囉…同埋想返去打下傳說，唔練多啲嘅話你女神搵晒其他主播唔搵我幫手點算喎，做人係要力求上進嘅。」無端端又發乜神經？
我：「試閘就唔好打機啦，早啲瞓咪重好。」
健：「咪就係打打下打到攰瞓著咪啱啱好囉。」
我：「咁你到底係驚無咗份廿蚊粒鐘嘅更低工資吖，定係驚某位女神唔理你先？」
健：「咁有得同佢講下嘢，可以望下佢都開心嘅…」
我：「嗯，你鍾意啦，我都要早啲瞓，想較返啱個生理時鐘，上堂成日瞓覺真係會死人。」
到咗第二日返學，我發覺到全校上上下下對住我都有啲唔太友善嘅目光；我心諗，同女神做朋友啫，都唔係我錯呀？雖然我自知自己配唔上…以前周街攬女又係咁，而家開學同人哋食餐飯又係咁。




第二日上堂無論先生定係同學都認真咗好多，尤其係我呢班本來就係學霸集中營嚟。今日幽蘭已經換返套潔白無瑕嘅稱身校服，睇得出比起其他女同學嘅標準校服係更加貼身，應該係有度身修改過，而長度就啱啱好坐低可以疊落膝頭哥，比起QQ斯文一啲咁啦。