thriXt Qantasy 純文字安眠之作 (New: - U2K - 一直上架): K249

瘟：「你哋幾位唔介意我過嚟同妳哋打聲招呼吖嘛？」
收皮啦你！區區一個社長算得啲乜？我好想咁講但當然唔夠膽，愚昧如我都識得分大細嘅。
Q：「唔介意呀，呢個係我好朋友，亦都係由今日開始會嚟我哋學校讀書嘅插班生，佢叫做Vienna。」
瘟：「Vienna妳好，今日成間學校都喺度討論緊一個超靚女嘅便服女仔，原來真係插班生嚟，而家見到真人，女神嘅朋友…果然都一定係女神。」
Q：「唔使賣口乖喇…佢係我個社嘅社長，Vincent。」
V：「呀！Queenie妳係乜嘢社㗎？我要同妳一個社！」
Q：「我咪紅社囉…但…社係有得揀嘅咩？」
V：「我乜嘢手續都未辦好，一陣叫校務處派畀我囉。」
果然有錢就是任性，唔可以用普通人個腦嚟諗佢哋。
瘟：「咁…我係咪要歡迎定新社員先？」




V：「可以吖，以後就請多多指教。」
瘟：「係呢，唔知妳會唔會有興趣參加社務呢？可以兩個一齊嚟幫手喎。」呢個狗賊出手果然快到…想必當年就係咁樣邀請到文書同財政姐姐，結果就俾佢兩隻玩返轉頭；但係…瘟神話佢放棄QQ，唔係轉個頭就嚟溝QQ個好朋友呀？唔通呢條友真係咁唔知醜？但佢嘅話確實難講…
V：「哈…入學手續都未辦好，我諗過幾日先啦。」
瘟：「咁我就等妳哋好消息啦；嗱，阿爽大佬，即係咁，我過嚟都已經感到腹背受敵，你…一個人喺度霸住兩個女神，驚唔驚自己會萬箭穿心？」
我：「有無咁誇張呀，食餐飯咋喎？」
瘟：「我只係好貼地咁分析，你睇下嗰邊食飯啲男仔個個都係咁擰過嚟望，就連啲阿sir都係咁留意…」
我：「唓，佢哋昅女咋嘛，關我乜嘢事喎。」
Q：「好心你兩個就唔好咁多幻想，每次一有插班生就係咁㗎喇，全校上下都會喺度討論，我唔覺有乜特別。」
瘟：「嗯…好高興認識到新同學，咁我都唔阻幾位嘅雅興，小弟先行告退。」假惺惺，假道學…
Q：「咁我哋食完飯都差唔多係時候返課室，繼續留喺度實在唔多自在。」喺我嘅薰陶底下QQ當然唔敢食剩嘢，而且佢有份搵錢都知道每一餐得來不易…




我：「Vienna妳杯嘢重有成半未飲喎…」
V：「飲唔落喇，一杯加一枝嘢重有湯，我已經成肚係水…」
我：「其實呢杯係乜嚟㗎，點解要咁飲嘅？」
V：「呢杯係卡拉曼柑汁，因為佢甜得滯，同埋我鍾意有氣，所以次次我都會mix嚟飲，就係咁。」
我：「唔通有錢女都鍾意飲有氣嘅嘢嘅？」
Q：「係呀，有錢女都要呼吸廿一%嘅氧氣添呀。」
我：「我可唔可以試下？」
V：「請隨便，都係咁啱呢間餐廳先有得飲。」