thriXt Qantasy 純文字安眠之作 (New: - U2K - 一直上架): K245

Q：「點會唔記得㗎，小學嗰陣咪畀過妳囉，嗱，而家再畀多妳一次，唔好唔記得喇。」QQ講完就好神奇咁喺裙袋攞咗枝筆出嚟，寫咗個電話號碼喺幽蘭嘅掌心。
Q：「對唔住呀…我記得妳電話號碼都無搵過妳，係我唔啱。」QQ呢個女仔真係好溫柔，無論男仔定女仔都會俾佢完全融化，當然係指佢僅有嘅溫柔時候啦。
V：「傻嘅，我去到都換咗電話卡，妳打嚟都唔通啦…」通唔通都好啦，面前兩個女仔已經通晒電，一齊淚眼汪汪，叫我呢個剩係顧住食飯嘅電燈膽情何以堪？
Q：「總之唔好喊，以後都唔使再喊㗎喇。」
V：「嗯，知道，係嘅Queenie。」
Q：「我都唔想有嘢瞞住妳，其實我已經唔再係有錢女嚟。」比起超級富豪個女點樣畀人校園欺凌嘅故仔，QQ呢一句對我嚟講更加當頭棒喝，右女神妳係認真㗎嘛？
V：「妳唔係講笑嘛…到底發生乜嘢事？」
Q：「唔係講笑，真係一窮二白嗰隻。」的確係嘅…不過當時嘅佢只要賣埋個手袋同波鞋就會有錢過我。
V：「點解會咁嘅？妳明明話爹地坐喺部電腦前面就會有錢收…」某程度上我覺得QQ而家係遺傳咗佢爹地。
Q：「無嘢係永恒嘅，收得錢多可能終有一日捐返晒出去，就係咁，我都唔知點解。」




V：「咁妳爹地而家點呀？」
Q：「哈，人都唔見埋咯。」
V：「世伯佢離開咗…呢個世界？」
Q：「欸，咁又唔係，應該話我都唔知道，已經失聯咗大半年，但我諗…希望佢只係喺世界上某一個角落安靜咁生活緊就足夠。」
V：「咁妳媽咪而家點？」
Q：「唔好提佢，我唔想討論呢個女人，千祈唔好再攪著我就得，最驚佢突然出現喺我面前要我救佢。」
V：「即係妳而家一個人住晒成間大屋？」
Q：「重大乜鬼屋，無咗喇…都話明一窮二白，我而家基本上係無家可歸嘅美少女嚟。」做乜失驚無神二次元…
V：「點解會攪成咁㗎…妳唔係要流落街頭呀？！」
Q：「咁又唔使，我而家住住喺呢條友度先。」




V：「吓？！你住咗喺男同學屋企！點得㗎？」
Q：「細聲啲呀，妳係咪想攪到通街都知呀…」
V：「Queenie妳唔好委屈自己啦，過嚟我屋企度住，而家我哋請少咗個工人多咗間吉房，如果妳唔鍾意工人房嘅話同我一齊瞓都得㗎，夠位可以擺多張單人床，就算瞓埋落我張床度都可以㗎。」有錢人果然夠氣派。
QQ呆一呆，然後望住佢擰擰頭。