thriXt Qantasy 純文字安眠之作 (New: - U2K - 一直上架): K242

我：「呢度得咖哩炒飯同埋媽咪炒米，味道同我自己炒無乜分別，但炒飯有青豆應該唔啱妳，另外重有蒸糯米雞，工場來貨同便利店嗰啲一樣，就連價錢都係，不過我勸妳快啲揀，如果唔係俾人掃晒就得返杯麪。」
Q：「咁…幫我買個炒米粉啦，其他嘢你話事，我唔太方便喺度迫，亦費事你咁大壓力。」
佢又唔係走咗去嘅，只係褪返去側邊等我買完。
一飯一米，魚蛋牛丸芝士腸各二，zero兩罐，都算豪。
畀咗兩罐zero佢搦就一齊行返去，幽蘭都有等埋我哋。
我：「嘩，個海南雞飯好靚喎，重有菜有湯有嘢飲。」一盒飯，一盒菜，一碗湯，三兜醬，一杯唔知乜汁，重有枝玻璃樽perrier，認真破壞環境滅絕北極熊。
V：「唉…咁多邊食得晒，話咗唔使理我…」
Q：「呢啲對妳嚟講係普通便當嚟啫…」
V：「對妳嚟講都係吖，幾驚佢走去grand hyatt買呀，嚇親妳啲朋友就唔係幾好。」
Q：「佢哋幾個無咁易嚇親嘅…不過grand cafe啲海南雞飯無傳說中咁好食啫，食過一次未覺得驚豔。」




V：「如果計抵食就呢間好啲嘅，grand cafe都要睇邊個落手煮㗎，如果我爹地打去訂定先係會好過就咁walk in去食一截，又或者直情去港灣一號食囉。」
兩個女仔講火星話，我究竟喺度做緊乜？
V：「呀，係咖喱魚蛋呀。」我已經食緊。
我：「大小姐，妳唔會同我講未食過魚蛋㗎可？」
V：「有乜可能呀，邊會咁誇張，係唔會咁食啫…」
Q：「分粒畀妳吖，但小心啲喎，滴到件衫就論盡。」
V：「嗯，我會呀，不過管家佢都搞得掂呢啲。」
睇住兩個仙女喺度喂食七蚊串嘅魚蛋，實在係…
V：「你哋都攞啲雞同菜吖，我食唔晒咁多㗎…」
Q：「叫佢清晒啲飯佢重實際啦，呢個飯桶嚟…係呢，其實如果之後lunch想出去食，係咪可以叫妳管家幫手？」




V：「我唔想咁，我剩係想同妳哋一樣…其實，而家講唔講得嘢㗎？」
Q：「乜嘢講唔講得嘢呀？」我以為得我聽唔明添…
V：「我嘅意思…即係佢喺度…」佢個樣極之唔好意思。
Q：「如果唔講得嘢，我就唔會俾佢坐喺度啦。」
V：「原來佢真係妳隻兵嚟。」
Q：「唔係，兵都有佢哋各自嘅目的，呢個兵都不如。」
V：「真係羨慕妳，可以manage得啲男仔咁好。」
Q：「有乜好羨慕喎，要趕走佢哋嗰陣重麻煩呀，就好似今朝個男班長咁，不過佢應該俾妳手字嚇走咗。」