為了實現媽媽遺願，我成為了女兒國唐僧: K229

鄧：「果然人如其名…係呢，介唔介意答下問題咁？」
V：「可以呀，我唔介意。」
鄧：「你哋有無嘢想問新同學呀，不過唔好為難人喎…」
慕：「冒昧問一下…點解妳唔係著校服嘅？」從Miss嘅眼神睇得出佢都係被蒙在鼓裡好想知道答案；而Vienna件旗袍右邊心口疊位上面就突兀咁夾住咗一塊透明膠牌入面寫住學生…要知道呢啲牌通常入面寫嘅係訪客、校友、嘉賓、家長等。另外塊牌係有啲乜嚟乜斜，因為要平嘅話就要用扣針穿過，但佢呢件咁高貴嘅衫當然唔用得…
V：「欸…因為呢幾日都有啲臨急臨忙，係琴日先決定會入讀呢間學校，今朝一落機就趕過嚟所以準備唔切，但我屋企人打點緊㗎喇，聽日就會著返全套整齊校服。」
「啱啱落機？Vienna妳係外國回流返嚟嘅？」
V：「唔係呀，我一直都喺香港生活，只係暑假度咗一個比較長嘅假咁囉，哈…」
「請問妳同Queenie同學係乜關係呀？」
V：「咪好似頭先大家睇到嘅咁，係朋友囉。」
嚟到呢度大家都靜咗，但我已經感受到嚟緊嘅風起雲湧，至少對我前面呢個女神騎士團嚟講…其他級嘅女神騎士團可能係指一堆精銳衛兵，而呢度嘅騎士團係指佢哋四個都係極其強悍嘅女騎士。




鄧：「咁幽蘭同學…不如妳搵個位坐低先，我啱啱講解緊中文DSE嘅範文篇章…」然後佢向住QQ方向行嚟。
V：「請問呢個位係咪無人㗎？」
我：「係！當然無人！請等一等，就等小弟為你打點…」說時不遲那時更快咁，我已經將左手邊枱面啲功課抬晒去隔行右邊枱，拍正並且對齊返前面嘅兩張枱，再幫佢拉埋張凳出嚟：「請坐。」
V：「呀…唔該晒。」佢望住我嘅舉動露出微笑。
「左女神」安坐後，我繼續企起身再筆直舉高右手。
鄧：「乜事呀…科長同學？」Miss滴汗咁望住我。
我：「鄧老師，實在非常感謝妳剛剛對我嘅教導，我而家深深咁明白到開學日嘅坐位排列絕對係冥冥中自有天意，亦深信而家呢個排位係值得維持返一段時間。」
「嘩…咁都得…反悔喎…唔好理佢…」群情即刻洶湧。
鄧：「呀科長，唔夠十分鐘之前你先想提我調位咋喎？」
我：「可見喺老師嘅循循善誘下，我愚子可教，深明大義，進步神速，感悟到道家老子無為而治，不變勝萬變嘅真諦。」




鄧：「好…呀，為師深深咁感受到你好學嘅態度，就星期一調位啦！同埋道家嗰句係不變應萬變呀！」
「哈哈哈哈哈！哈哈哈…」
鄧：「重有，麻煩班長或者主席幫我整塊座位表呀。」
呢個時候，身為男仔總會第一時間望住個女。