為了實現媽媽遺願，我成為了女兒國唐僧: K227

我：「咁妳都可以關心一下妳啲可愛嘅學生嘅…」
鄧：「哦，有無人對開學不適呀…有無人隔籬坐咗個仇家呀…哦，應該無…拜託唔好激我，我已經好煩。」
慕：「鄧老師有啲乜煩惱呀，或者等我哋分擔下？」
鄧：「得嗰一日準備時間就要我教DSE你話煩唔煩，而且重有其他…我唔想提喇。」
我：「為咗減輕妳嘅煩惱，麻煩所有同學傳啲暑期功課出去先…」我做下樣都要嘅…
鄧：「咪住！唔好阻住我張枱！你哋傳去後面啦，一次過得㗎喇，條友會自己分好小息攞落嚟，放晒喺最後排張枱，個排長會行晒成排收，大家唔使幫佢。」
然後，可想而知個情況會幾咁壯觀，又閱讀補充，又作文，又工作紙，又剪報，又暑假記趣…
U：「記住唔好偷睇我哋啲功課呀！」
我：「傻嘅咩！小弟生平最憎就係功課，鬼得閒偷睇！」
Q：「係平生呀！生平！你係咪以為自己已經往生？」




「哈哈哈哈哈！哈哈哈…」
我：「對唔住囉，一時口快快講錯咋嘛。」
Y：「知錯能改，唔錯！就准許你平身啦。」
「哈哈哈哈哈…」我都話得Zilvia係好人嚟…
鄧：「俾你哋歡樂多一分鐘，跟住我要開始講書喇…」
雖然分唔切，但我都好識相咁收集晒所有功課放喺側邊嘅兩張枱，至少我都知道自己有責任保管好啲功課。
我：「Miss Tang呀，多口一問…係咪會調位㗎？」
鄧：「你哋咁坐得實有箇中原因，觀察下先啦。」
我：「無原因㗎，完全係一個意外嚟…」
鄧：「呢樣都係我煩緊嘅其中一件事，聽日先再算啦。」




我：「明日復明日…」feel到有其他同學想打我，但暫時都唔會有人夠膽咁樣開聲住，而當然我同Miss其實心照，我只係喺度攪下爛gag等大家過日晨。
鄧：「明日何其多！講書先，不如就首先講下DSE中文嘅syllabus，同埋有邊幾份卷，都remind一下我自己…」
講真我又點會迫佢調位吖，其實坐呢度望住兩個女神嘅背脊都唔錯嘅，總好過要對住個三唔識七嘅男仔。
鄧：「嗱，以前會考白話加文言文範文有成廿幾三十篇嘅，而家就得返十二篇文言文啫，我哋可以先大概分析下有邊幾類…」
「啲…嘟啲…嘟嘟啲…嘟啲啲…」喺Miss身上傳出鈴聲。
鄧：「殊！…，喂…嗯…係呀，無錯…可以…知道…bye…」
聽完個電話之後Miss個心好似離一離，加少少反白眼。
我：「Miss…上堂嗰陣唔熄電話會唔會唔係幾好？」