thriXt Qantasy 純文字安眠之作 (New: - U2K - 一直上架): K223

Q：「唔係啦，我哋真係喺度認真謦社務㗎…如果佢好似你講到咁aggressive，重唔一早約埋我食晚飯咩，點會散咗就由得我返屋企。」
我：「就算人哋約妳食飯都可以say no嘅啫。」
Q：「未必㗎，唔使錢又有好嘢食點解唔考慮下喎。」
佢講得無錯，YY今日資助我食放題我都覺得好爽，只係要女人請實在唔係幾好意思…但對住佢實在無謂客氣。
Q：「不過呢，唔知點解瘟神佢同另外兩個中三妹熟咗，而且重想塞啲細囈位畀佢哋做，可能已經轉咗目標呢。」
我：「佢哋靚唔靚女㗎？」我當然扮到乜都唔知。
Q：「普通…中上啦，都幾得意嘅。」
我：「咁都係妳吊高嚟賣，佢覺得酸微微先轉場啫。」
Q：「黐線㗎咩，我有仔㗎喇，關乜吊唔吊高嚟賣事喎？」咁我又唔明妳有仔點解唔一開始斬釘截鐵拒絕人，而且就算到而家都成日出現喺人身邊，迫人吊癮。
Q：「不過Uranus就重煩，黃社無乜人想做成班唔嗲唔吊咁，社務老師強烈建議佢慎重考慮一下擔當社長呢個位，由於事出突然所以佢都重猶豫緊。」




我：「而家選社長唔係選班長喎，唔想做咪唔做囉。」
Q：「又唔可以咁講嘅，先生叫佢做都係因為睇得起佢，加埋佢體育成績出眾，佢又唔係完全唔想做嘅，萬一叫咗個無嚟搭霎嘅人做社長，佢要拍住人哋做咪盞重辛苦…同埋你都知啦，男仔鍾意做呢啲位好多係為咗溝女，而我哋做又唔會掉返轉去溝仔嘅，佢就更加唔會添啦，所以可以講話係無乜著數可言。」
我：「我哋又無乜人係黃社，想幫都幫唔到佢。」
Q：「佢重喺度煩埋啲無謂嘢，咪同你講過佢上年數學第一嘅…」其實係佢自己攞住份卷眉飛色舞走入嚟曬命…
我：「記得…唔知九十四定九十六吖嘛。」
Q：「聽返嚟原來嗰次係周B鬧鐘壞咗唔知醒遲咗半個鐘返學校，佢有一題十五分嘅做唔切，結果做咗嘅八十五分啱咗八十四分。」
我：「咁無做就無做㗎啦，做咗實啱㗎？」
Q：「以佢嚟計做咗嘅話就好可能實啱。」
我：「人哋都外星人嚟嘅，非人也，有乜好比較？」
Q：「咁以女仔嚟講Uranus又真係長期第一，咪咁囉。」




我：「杞人憂天，攞苦嚟辛，咁妳無嘢煩喇嘛？」
Q：「最煩咪呀男班長囉…」
我：「乜妳諗住理佢㗎？」
Q：「有得揀我梗係乜都唔想理啦，但我又唔想啲關係攪到太差，你都知Uranus同Yvonne兩個平時唔經唔覺就會得罪幾多男仔㗎啦，我唔想個個男同學寫週記都要參我哋一筆咁…加埋…佢中二嗰陣有同我表過白…」