為了實現媽媽遺願，我成為了女兒國唐僧: K217

如果有一日無咗QQ，可能我真係會想溝返個有錢女。
然之後我哋就好似一般同學咁行去書屋搦書…
我：「頂，三年DSE書一次過搦，妳係咪癲㗎…」
Y：「唔想行多轉嘛…咪嘈啦，已經幫你攞咗四本。」
哈，呢個女仔實在係黐線，我上次講過剩係數學已經六本，化學又五本…我左右手各攞住一個最大嘅書袋，入面有成十幾本書，需知道重都唔係最大問題，而係個手抽位係會鎅手㗎！
我：「搦咁多做乜唔攞定車仔或者喼？想玩我咩…」
Y：「咁我無理由攞返學校㗎嘛，又唔係我搦，而且我都無諗過會咁重。」我發覺女人真係無乜生活邏輯。
我：「呢度旺角…妳唔會諗住行返屋企㗎可？」旺角去奧運，呢段路我平時一定唔會畀錢搭車。
Y：「唔會，傻嘅咩，咁遠，搭的士返去樓下啦。」
我：「呢度內街…何來會有架的士鏟入嚟咁傻仔。」




Y：「一係你放低啲書，行返出街口截架的士駛入嚟載返我，再唔係，我可以睇下call唔call到UBER入嚟…」
我：「算啦，一齊行出街口…我重頂得住。」
雖然係辛苦啲，但都完成任務去到佢樓下，的士停低嘅地方當然唔係一條大街，而係穿過奧海城一條斜路通道嚟到屋苑平台。當然地我係要運埋佢堆書送上門，行入大廈大堂個保安哥哥見到我成隻狗咁跟住YY都心知乜嘢事，只係望住我會心微笑咗一下，無問我係咪一齊或者要做訪客登記。
入到（車立），我見到佢用銀包嘟咗一下㩒層數塊panel，跟住某一層就著咗燈。
我：「吓…唔係掛，豪宅搭（車立）要畀錢㗎？」
Y：「低能…大廈保安呀，唔係住嗰層就㩒唔到（車立）。」佢好似望住原始人咁鄙視我。
QQ同我講過豪宅分好多種，我而家知道咗YY絕對唔係住大角咀啲舊樓而係奧運站隔籬啲新樓，礙於唔想你哋班友去打攪佢我就唔講係乜屋苑嘞，不過喺海邊就一定㗎喇，而我亦都唔識分呢度high class啲定Zilvia嗰度high class啲，我只知道自己望塵莫及。
我：「如果唔記得帶八達通出街係咪會流落街頭？」
Y：「一，你可以搵管理員幫你㩒，二，你可以登入電話app㩒，三，可以叫屋企人救你。」
我：「電話app…咁我咪可以喺條街度玩到幾部（車立）碰碰車咁？」