thriXt Qantasy 純文字安眠之作 (New: - U2K - 一直上架): K215

我：「咁會唔會唔係幾好，我出返自己嗰份囉。」
Y：「做乜呀，你啲錢唔係貢獻晒畀妳女神喇咩？」
我：「而家好啲啦…佢搵啲錢隨時重多過我。」
Y：「係嘅，我哋啲肉咁值錢，唔攞嚟賣實在大嘥。」
我：「妳唔好咁話佢啦，佢其實真係好努力諗緊辦法…所以…我食平啲咪得囉，或者嗌份炒麪咁。」
Y：「你煩唔煩啲，好喇，總之你當平時食lunch咁，畀返五十蚊我就得，唔好咁多聲氣。」
入到去朗豪坊，我哋就搭扶手電梯係咁上去。
Y：「嗱，睇下啦，晏晝嚟食好平㗎，兩嚿水都唔使就有得放題，夜晚要成三百幾㗎！」
我：「但無端端…使唔使食放題呀，單點八九十啫。」
Y：「單點都八九十就梗係食放題啦，又係你話好肚餓嘅，入去啦，而家你係主人定我係主人呀，不過你唔好同我嗌飯呀，打扁你㗎。」




我：「傻嘅咩，食放題又點會嗌飯，貪過癮咩…」
其實我每次食任食火鍋都最少食一個公仔麪，可能因為間間酒樓都標價廿蚊，啲肥牛質素其實又普普通通。
坐低之後佢就點咗兩個中級plan，畫咗一個雜錦肉同一個魷魚泡菜芝士御好焼，一堆肉同埋沙律；其實呢度同普通鐵板燒無乜分別，只係多咗個大阪燒畀你玩同更加容易塞飽你。同有錢女出嚟行街真係幾好，食乜買乜都係佢包晒唔使煩，點解我以前會睇唔起QQ，應該早就認低威俾佢包起可能會比較快樂。
可惜我眼前嘅係Yvonne而唔係我最心愛嘅QQ…
呢個女人確實言出必行咁攤大手板等嘢食，咁要我煎兩塊麪粉餅又無乜嘢嘅，反正重點係啲燒汁同沙律汁。
Y：「見你同Miss Tang好似好熟，佢教書掂唔掂㗎？」
我：「佢呀，我係覺得佢幾好人同埋有啲傻傻地咋，教書掂唔掂不如妳問返Queenie啦，我對先生無乜要求。」
Y：「咁又係，都唔知你平時有無聽書嘅，不過就咁睇Queenie之前中文考試成績，應該無乜問題嘅。」
我：「我覺得呢個女人唔使先生教，自己學都無乜問題。」我又拮佢啲沙律嚟食。
Y：「嚟緊三年要日日睇住你兩個喺度扮無嘢，諗起就覺得搞笑。」




我：「係呀？妳唔好唔記得我同妳都喺度扮緊無嘢。」
Y：「吓，咁我同你又真係無嘢喎，又唔係有乜嘢要隱瞞，我同你熟又得，唔熟又得，只係我控制嘅啫。」
我：「妳塊魷魚燒就真係熟咗食得喇，開餐啦。」