為了實現媽媽遺願，我成為了女兒國唐僧: K212

Y：「人哋U grad出嚟做緊嘢㗎喇…不過佢縱到個細佬壞晒，啲脾氣…亦因為咁佢好識同女仔相處囉。」
我：「聽落你條仔都幾令人又愛又恨。」
Y：「少少咁啦，如果唔係佢家姐嘅話應該早飛咗佢。」
架車就到太子嗰陣停咗喺度，又賴落乜訊號系統恢復…
我：「無請工人…咁妳同阿哥會幫手做家務？」
Y：「自己房就不朽自己執返㗎啦，其他嘢可以請鐘點，每個禮拜上嚟幾粒鐘就搞掂啦。」
我：「本地鐘點係咪好貴㗎？」
Y：「當然唔平，時薪百幾二百，追得上補習。」
我：「咁高人工，我聽到都想做埋一份…」
Y：「你唔好睇少人哋啦，人哋做咗十幾廿年酒店執房見啲仔女大晒先退休轉做兼職，你識條毛咩…」




我：「係呢，妳知唔知道Queenie佢留喺學校做乜？」
Y：「哈，你同佢friend到咁，點解唔直接問佢呢？」
我：「妳喺度吖嘛…雖然問佢嘅話應該都唔會呃我。」
Y：「佢咪去謦社內閣啲嘢囉，啲先生好緊張搵唔到人㗎，Uranus都係，佢同Zilvia重要報名訓導組prefect啲嘢，兼且Zilvia係librarian…」
我：「社內閣，唔使問阿貴一定又係瘟神啦。」
Y：「做乜，呷醋呀？我頭先聽到佢哋成大班約lunch。」
我：「傻啦…呷乜鬼，要呷佢一條仔已經夠呷死我。」
Y：「係㗎喇，我哋呢啲要換十條仔都未輪到你啦，好心你就唔好太多幻想，俾女神食到得返棚骨就有，唔差在同你講埋，男班長今次睇怕係對佢認真。」
我：「佢識返屋企咪得囉…妳覺得Myth佢有無機？」
Y：「睇怕就唔大，我哋四個喺埋一齊嘅話好難有機會俾佢攝到入嚟，除非佢有機會製造到獨處時間，又或者Queenie主動投懷送抱，估計就唔會嘞。」




我：「妳哋實好開心啦，四個可以做同班同學。」
Y：「有好有唔好啦，行得太埋就會好似困獸鬥咁，其實係會有壓力…」
我：「妳哋四個都咁叻女，都唔知有乜好鬥。」
Y：「係咯，好似你咁放pea咪攪到你咁囉。」
我：「乜喎，我有努力返啲㗎喇，如果唔係今年點會做到妳同學…雖然重有好大段距離。」
架車停咗五分鐘有多先埋返太子站，月台上面積咗一大堆客，包括啲身水身汗嘅速遞員，連人帶貨咁成堆塞晒過嚟，喺壓縮嘅空間之下我哋嘅距離差唔多身貼身…
我：「妳OK吖嘛…」Y：「嗯。」