thriXt Qantasy 純文字安眠之作 (New: - U2K - 一直上架): K205

我：「唔好，你掉低佢一個我會變成罪人，而且我一個人就可以生存得好好，唔好污染我嘅清幽生活，打亂我嘅兀凳業務。」
健：「唔知你呀…你覺得，喺呢班會唔會好難撈？」
我：「難撈？我有得兀凳就好自在，理得其他人點吖，你咁驚咪學細龜咁，書有書讀，機有機打，金有金課，咪又係咁過，重有隻傻豬睇住佢。」
健：「其實阿朱佢做乜會同細龜咁friend嘅？」
我：「我唔知噃，因為同社？佢哋好似中二同班，但其實同細龜做朋友幾好呀，佢唔會煩住你，又唔會畀麻煩你，零壓力架喎，好過啲人仔日日嗌無女又唔去溝。」
健：「我放棄咗啦，唔會再講呢樣嘢。」
我：「係咪幫個靚女打工，睇住佢點樣用對腳呃㞗啲傻仔錢，睇到化咗喇？」
健：「少少啦…有時同佢講下嘢，先發覺自己乜都唔係，女仔又點會鍾意自己喎，所以算啦，而且我哋班十二個女仔，應該都係呢個結論。」
我：「何解呢，其實靚女都唔少，甚至非常出眾。」
健：「你有Queenie照住梗係咁講，你睇下Uranus可以咁樣對男班長，而對你就無乜嘢…」




我：「乜…我同佢真係咁明顯咩？」
健：「你諗下喎，Queenie喺學校除咗會搵你同社長之外重會搵邊個，即係話雖然你係無所事事但人哋睇你已經係同社長同級，點都會畀下面你。」
我：「唔需要囉…我返學只係想輕輕鬆鬆咁捱下時間，不過呢，你又唔使將個世界局限喺一間課室入面嘅，得閒咪同欣姐佢打多啲傳說囉。」
健：「咪難為我啦…我同佢邊係同一個水平。」
我：「你琴晚返到屋企有無打人哋飛機吖？…，唔出聲即係…你鍾意囉，係要執著埋啲無謂嘢，人哋正就係正㗎啦，呢啲嘢好客觀，又唔係要你畀埋條命人哋。」
健：「重好意思講我，明明自己主動出擊Janey。」
我：「無喇，琴晚返到屋企已經同佢講清楚，無事發生。」
健：「吓？可以點樣講清楚？」
我：「用廣東話講囉，只係唔想下次見會面阻阻。」
吹完一輪水，鐘聲響起我哋又返上去個修羅場度。




完全唔明Miss做乜無調位嘅打算，唔通為咗玩我？
其實開學日真係無乜嘢做，Miss再三叮囑我哋聽日要交齊暑假功課，今晚係最後趕工機會，呵呵唔關我事。
鄧：「吖，係喇，我重要幫你哋影幅數碼學生相upload去學校server…」明明係個後生女嚟，都唔明佢講嘢做乜會咁古人，呢個年代重邊有非數碼相㗎，連啲即影即有機都變埋兩用啦，真係同手冊上面張證件相一樣食古不化。