為了實現媽媽遺願，我成為了女兒國唐僧: K202

易：「我贊成，Myth哥一定可以勝任班長呢個位嘅！」呢個係姓『亦』嘅小朋友，如果讀咗做『異』佢會有好大反應，我又無乜嘢驚嘅，只係對佢哋零興趣，本身就唔係同一個世界嘅人，記憶中一句嘢都無講過。佢英文名叫Louis，比起高大俊朗嘅Myth…佢就有啲細粒，外貌cute cute地，可惜份人一啲都唔cute，串嘴得嚟又小氣，要類比嘅話，大家可以回想一下公主男朋友Charles仔。
見佢應聲蟲咁和議，就知佢係Myth哥嘅跟尾狗嚟啦…而Myth，中文名叫慕容天行…係呀，個名都浮誇過人，取其中文名拼音第一粒字母砌埋就係英文名。
算啦，講個名浮誇我都無乜資格話人哋，唉…
鄧：「唔緊要，最緊要係有人做…咁女班長…」
U：「Miss…妳唔使咁樣望住我㗎，我今年啲職務可能會有啲多…」
鄧：「我明嘅，我只係諗住妳熟手…做班長易如反掌…」
「鄧老師，希望妳唔好對我有啲乜期待，我只係想專心學習，而且我已經擔當緊prefect嘅職位，請恕我無法一心多用，非常抱歉。」又係考第二…
鄧：「欸…不過其實呢班女仔都唔係得好多個…」
從而家嘅座位排列嚟睇呢…女神有四個，書蟲有三個，姣閪有三個，重有兩個散餐嘅，包括健仔隔籬嗰位，合共女同學十二位。
U：「得，我都唔想令Miss妳難做，我可以做住先，但係不如咁吖，當我忙嗰陣可以俾我轉讓班長呢個位置畀其他女同學做，咁樣唔知妳O唔OK呢？」呢啲就係霸氣…




鄧：「妳覺得咁樣行得通…未嘗不可嘅，如果妳搵到人替嘅話。」睇Miss個樣只係想盡快甩身…
Uranus望下身邊嘅Zilvia，又擰轉面瞀下後面兩隻。
Y：「得啦，好姐妹有需要唔會唔幫嘅。」
Q：「放心啦，我哋一定有借有還嘅…」
鄧：「轉還轉…都唔好日日轉咁密呀，我唔想俾其他先生問我搞乜鬼…」然後男女班長就出去攞個鐵章扣喺心口上面。
慕：「Uranus，我哋嚟緊有好多機會合作嘞…」
U：「哦。」佢無心裝載咁回咗一粒字，叫好過用鼻答。
鄧：「到下一個問題，就係班會主席…你哋應該可以自己搞掂？或者兩位班長有無啲乜提議？」
坐最後有最後嘅好，彷彿我就從未存在過咁。
豬：「點解…每一次都係要望住我！？」




U：「老師唔會以貌取人，我會，就係咁簡單。」