為了實現媽媽遺願，我成為了女兒國唐僧: K195

Q：「喂！死仔包！你個鬧鐘響第三次喇，就返學呀！」
我：「嗯…無問題。」我望一望重有三十分鐘，實在…眼瞓到郁唔到，坐起咗個身繼續瞌埋眼。
Q：「你重唔起身？！遲到我唔Q理你㗎！」
我：「乜呀…咪起咗…」我瞌埋眼答佢。
開學…有健仔，QQ，YY，Zilvia，Uranus，肥豬，細龜…如果同Zilvia坐都唔錯，我又唔會話忍唔住對佢做錯啲乜，可能可以幫下佢同男仔相處，如果同Uranus坐一定好難頂，細龜都唔錯，睇佢課金抽卡幾舒暢…嗯呼…
嗯，係時候起身…今日九月一開學…
我：「屌！仆街！得返十四分鐘！Queen…」當然女神早就出咗門口返學，得返自己一個喺間屋入面。
趕返學校嘅多餘情節請參閱其他故事，呢度唔嘥口水。
我最叻就係喺校工閂緊閘嘅時候化身成刀片咗自己入去。
疱丁解牛都有教，以無厚入有閒，恢恢乎，其於遊刃必有餘地矣，返咗咁多年學早就變成忍者。其實係校工叔叔有好生之德，不忍夾死我呢個脆弱嘅小心靈。




但係訓導已經企咗喺門口，我正打算若無其事行入去。
「阿爽，你做乜第一日返學就遲到呀？！」
我：「咦，阿Sir你竟然記得我個名嘅…」然而我一時之間唔記得咗佢姓乜，又唔可以嗌佢花名喎。
「有幾難記呀？你又唔係乖到識隱形嘅學生。」
我：「係嘅，不過我成功入到嚟，應該唔算遲到吖。」
「你講嘢呀，如果唔係明哥怕夾到你煞停道閘，你有乜可能攝到入嚟呀？」
我：「係嘅，sorry sir！因為開學要適應所以遲咗啲…」
「知錯就得啦，自己去校務處報到記名啦。」
我：「蘇sir，難得今日開學咁開心，呢啲普天同慶嘅日子不如就放過我啦。」其實記唔記名我唔多care，不過慣性我都係會講下數；啱啱醒起佢花名叫牛脷酥，緣於佢真名叫蘇利謀，都唔知邊鬼個老竇咁市儈改埋呢啲爛名，而個仔就咁該煨走去教書，真係激死老竇搵山拜。
「你好開心咩，開學我唔多開心㗎咋喎。」




我：「阿sir你諗下，今日開學大家都鬼咁忙，校務處一定踢晒腳，可能連本遲到簿嘅簿皮都重未寫好，無謂加重大家工作量吖，咁就大家都開心。」