為了實現媽媽遺願，我成為了女兒國唐僧: K165

何：「嗱，我計返食物錢㗎咋，無論點計我今晚無可能收每人多過二百，就算計埋幅相都係咁話，況且本身影相就應該係妳收嘅，所以呢度係妳應得。」
Q：「但係…除咗食物，重有場租㗎嘛。」
何：「傻女嚟嘅，我平時賣嘢食會唔會另外收場租呀？夠㗎喇，呢三個鐘出埋雙糧畀沙織都賺到突。」
沙：「多謝女僕長！」打工妹嘅快樂實在係簡單。
Q：「我唔好意思嘛，只係彈下琴謦下計就收咁多錢。」
何：「妳鍾意咪下次收佢哋平啲囉，總之我唔會攞多過我應得嘅，唔好唔記得妳條裙，妳部琴，妳啲化妝品，練琴嘅時間全部都係成本嚟。」
我：「呢個妹妹仔都幾犀利，一晚mini show就千七…」
沙：「如果晚晚都有一場嘅話就真係不得了…」
何：「會月薪五萬，係香港月入中位數嘅兩倍幾，經理或者專業人士嘅人工，重要唔使交稅。」
Q：「哎吔！咁樣望住我做乜，我邊可能有咁多fans喎，一年玩兩次都飽和啦，唔好講到我上咗岸咁…」




何：「而家無啫，難保將來有呢，可能妳會上紅館添呀，Queenie妳咁叻女我一定睇好妳，係嘞，我都差唔多要落閘，你哋可以行先。」
沙：「Queenie！我可唔可以同妳影返張cheki呀？」
Q：「當然可以啦…不過我哋已經換晒衫。」
沙：「無所謂，對我嚟講重要係個人，唔係套衫。」
正當女僕長攞起部機想幫佢哋影嗰陣。
沙：「保鑣X過埋嚟一齊影吖！」
我：「我都有份嗎？」
沙：「梗係有！放咗工要開心啲，唔可以再木口木面。」
我：「哈哈，保鑣呢行係七廿四㗎，邊有返工放工。」
沙織示意我企喺佢左手邊，QQ就喺右手邊，沙織用佢隻玉手繞到我手臂實一實…我認我犯賤，雖然喺屋企我日日可以同女神糖黐豆，但每次一接觸到新嘅女仔我都不可抗拒咁有觸動嘅感覺，幻想自己每日可以俾個女僕服侍。




唔知係咪自己嘅錯覺，自從QQ嚟咗我嘅身邊，周圍啲女對我都好似好咗好多，有感覺從良嘅細蚊，有從來無諗過會倒追我嘅Wendy，就連一啲只係偶遇嘅女仔…
女僕長一連影咗三幅相交畀我哋。
沙：「起碼…都幫我簽埋個名先？」
Q：「可以，不過…我應該簽邊個名比較好？」
沙：「欸，最好就簽齊佢啦！」沙織盡顯女僕嘅熱情。
『黑桃女王·Kuromi·Queenie』。
沙：「正呀，好似one piece咁！」然後佢畀咗枝筆我。
諗咗陣，『保鏢·X·交叉仔』。
沙：「哈哈，好開心呀，咁我哋行先喇女僕長。」