為了實現媽媽遺願，我成為了女兒國唐僧: K159

Q：「咁…你想我幫你畫乜？」
「呢啲嘢當然梗係由女王親自發落㗎啦。」
Q：「我畫個斷頭台喺度好唔好？」就算我喺角落頭都聽到想爆笑，我永遠都覺得毒舌嘅QQ先係最正。
「咁又…唔係幾好嘅，畫妳鍾意嘅嘢就得。」
只見QQ大筆一揮，其實佢點會唔識畫嘢吖，間唔中見佢喺啲筆記簿上面畫嘅公仔都好鬼死靚。
「嗯，請問呢隻係乜…係咪比卡超？」
Q：「估錯無奬，係Melody嚟。」點算…我好想笑。
「女王，咁呢個又係乜嚟？」
Q：「你係禁軍嘛，咪畀塊盾牌同兩把劍你。」
「我重以為係校徽嚟…」QQ妳到底認真定玩嘢？




終於，我都等到杯darjeeling同埋碟肉醬意粉。
「女王，不如妳都一齊食吖，咁先係聚餐㗎嘛。」
Q：「好呀，等一等呀下。」然之後QQ就入廚房攞咗碟肉醬意粉，睇嚟佢都係一個明辨是非嘅好女仔。
前排嘅…同學仔，執咗一執啲枱圍住佢坐，褪返大半張枱面出嚟畀佢放碟意粉；而第二排嘅亦都褪前咗半個身位希望可以更加接近自己嘅偶像，至於第三排…就算啦，可以喺外圍聽到佢哋嘅對話就已經當贏咗；至於我，都係喺度暗中觀察保護QQ嘅啫，雖則我唔覺得有乜可以做到。
沙織就無咁好彩，聚餐係唔關佢事嘅，佢重要一路幫我哋咁多位斟茶遞水，收走啲食完嘅碗碗碟碟，最後就為我哋奉上一個奶凍布甸，估唔到嘅係甜品竟然用一個瓷杯仔載住而唔係膠兜，睇嚟個店長都有啲要求。
佢哋啲對話都係離唔開嗰啲啦，例如問QQ讀書讀成點，揀咗乜嘢科，QQ就呃㞗佢哋話自己升中五，又問佢學咗幾耐琴，鍾意乜嘢音樂，每當QQ講完一樣就會有人話「我都係呀！」諸如此類。雖然我哋身處現實世界，但終歸係網絡延伸出嚟嘅一個空間，經歷過Kuromi傻仔健事件嘅我點會唔知，而寫人設就更加係QQ嘅專長。
食完嘢，QQ就彈埋剩返嗰幾首歌，同埋影即影即有相嘅時間；好笑，我見到部instax第一時間唔係諗住要同QQ影相，而係瘟神佢喺暑假到底做咗啲乜。至於啲相，QQ亦都控制得宜，頭排嘅會黐埋啲同有少少親匿嘅動作，例如捉手臂咁，而幅相亦會有佢嘅親筆簽名同埋句子。
Q：「開方X…開方X…喂，到你喇！」我差啲唔記得咗自己叫乜名，嗌咗幾聲先識應機行出去企喺QQ隔籬俾沙織幫我哋影，出嚟之後QQ又喺上面求祈簽個名。