為了實現媽媽遺願，我成為了女兒國唐僧: K150

上到巴士，我哋走咗去上層後排啲位，因為要食餅就盡量唔好影響人哋啦。而由於QQ話要一人一半嘅關係，所以我咬咗一半就迫佢食我嘅口水尾，而佢亦都好大方咁放咗入口，就係咁一人一啖喺度食Zilvia啲餅。
Hea咗兩日，就到咗QQ粉絲見面會嘅日子。Sorry，係我hea啫，QQ一直都好勤力，包括練琴，安排座位，粉絲聯絡，餐單設定，有的沒的，不可開交。
Q：「喂，你一陣記住準時，我唔要你早到，亦唔准你遲到，喺搭正七點半入去就得。」
我：「知喇，我都唔想同其他會員打交道。」
我唔知點解會用會員呢個字，可能覺得佢玩玩下就會有啲乜後援會嘅邪惡組織，十足十邪教嗰啲。
Q：「重有，你個位會喺右後方個死角，應該可以睇到所有人嘅舉動，如果有人違規影相，拍片，唔該你用個好嘅方法通知我。」
Set我喺死角係因為佢假設咗我係課得最少嘅二打六，即係山頂位，無得同偶像握手嗰啲，亦會俾其他人歧視同睇唔起…fine，嘢食一樣就得。
我：「無問題，我會舉手大嗌，Miss陶，嗰位同學出貓呀！」佢有同我講過個場嘅類似設計。
Q：「如果發生呢種事，我保證你嚟緊呢半年無得掂我。」其實又唔係妳邊個，無得掂好正常啫。
我：「明白！我會眨隻左眼三長三短三長嚟通知妳。」




Q：「你信唔信我打到你pat pat壞掉，屎眼會三長三短三長咁屙出嚟。」嘩，女神講屎眼呢兩粒字都特別性感。
我：「咁妳想我點通知妳？」
Q：「Send message畀我就得，部電話我會放枱面。」
我：「妳一早講吖嘛，鬼知妳想點喎。」
Q：「另外，會有個叫Anson嘅肥仔，唔高嘅，網名叫妳的侍衛大臣梅花積，幫我留意下佢有無奇怪嘅舉動，雖然我諗佢應該會正正常常。」
呢啲咁弱智嘅網名…我都即刻幫自己改返個，䃈磚二打唔過紅心六，括弧除非鋤大Dee啦，掂呀！
我：「做乜呀，仇家嚟？變態嘅？咁重俾佢嚟？」
Q：「未至於嘅，奇怪啲啫，咁我哋要有待客之道。」
我：「得喇，毒撚錢容易賺吖嘛，明白晒。」
Q：「最後，唔該你保持低調咁幫我認得晒所有人，活動完咗之後過一陣返嚟睇下有無古怪，無就上嚟接我。」




我：「該煨咯，嗰度大街嚟又唔係後巷，妳使唔使驚到好似會俾人拖入後巷被迫做啲大家都好想對妳做嘅嘢？」
Q：「我唔理，總之你負責好等我可以毫無顧慮咁走就得。」點解我去睇表演好似重攰過返工…