thriXt Qantasy 純文字安眠之作 (New: - U2K - 一直上架): K148

Q：「你有無諗過帶彼拉多喺幾大嘅工作量？人哋重有其他嘢要做㗎，本身講好咗工人只會一個禮拜帶兩日，而且唔會陪佢跑只係散步，同埋天才你記唔記得今日係星期日人哋放假㗎？Zilvia唔舒服已經搵Uranus幫咗兩日手，所以今日先搵我咋嘛。」
我：「我覺得佢唔會搵Yvonne幫手。」
Q：「應該係，睇怕得佢一個人會搞唔掂彼拉多。」
我：「Zilvia真係好犀利，Uranus都係。」
Q：「使乜講，唔通好似你咁成日攤喺床玩電話。」
我：「其實…如果Zilvia咁驚男仔，會唔會變咗Les㗎？」
Q：「呢層…我真係唔知，我只係覺得佢無乜感情需要…」
我：「如果佢同妳表白，你會諗住點？」
Q：「唔好掛，我覺得就算係都搵Uranus啦，襯啲。」
我：「可能人哋貪妳可愛啲同埋溫柔啲呢。」




Q：「但係我有男朋友…無論點都唔係幾好掛…」
我：「你請佢食檸檬小心整喊人呀，可能妳男朋友唔介意呢？」自己條女多咗條女，聽落好似感覺不錯。
Q：「百合…我諗我未至於抗拒嘅，Zilvia又真係一個非常好嘅女仔，如果開多個department應付兩邊…」望住佢個認真樣，都feel到佢有潛質，加埋好似有啲花心。
Q：「妖！點解我要咁認真陪埋你呢個PK仔癲喺度諗啲無謂嘢，唔理你呀，跑埋最後呢一段佢啦！」
過咗幾分鐘就跑到返樓下，Zilvia落咗嚟接我哋。
Q：「跑咗差唔多兩k，我諗呢隻嘢夠皮㗎喇。」
Z：「真係麻煩晒你哋，見到佢個開心樣就知。」
我：「嘻嘻，彼拉多喺度傻笑呢，唔知以後重有無機會陪你玩。」
「汪！」聽到我嗌佢，佢又撲咗埋嚟…
不過今次我醒，扎好個馬步迎接托佢胳肋底，而佢就將對手撐落我排肋骨度；唔講得笑，係有啲痛，真係少啲肉都頂唔住同一個女仔一樣重嘅佢。




Z：「彼拉多！Stop呀，你手手污糟！」
我：「唔緊要啦，我都唔係乾淨得去邊。」
Z：「又會咁鍾意同你玩嘅…點解會咁…」
我哋好似相撲咁推咗陣，見佢隻手開始放力就坐低個人等佢順利落返地，亦避免佢搲親我。
Z：「呢度…小小意思，多謝你嚟幫手帶狗。」
我：「噢…非常感謝。」我接過佢手上嘅紙袋。
Q：「得佢有份？我有無㗎？」QQ䚎我個紙袋。
Z：「妳想要咪叫佢畀啲妳囉，我同妳咁熟唔特別送嘢啦，下次請返妳同Uranus食飯就係。」
Q：「有需要可以再搵我㗎，我應該得閒過Uranus。」
Z：「唔使喇，我差唔多好返，後日會帶返佢跑。」




Q：「嗯，咁再約啦，妳快啲帶佢返屋企洗腳仔。」
然之後，我同佢沿斜坡落返去巴士站等車。