為了實現媽媽遺願，我成為了女兒國唐僧: K143

Z：「你好。」佢向我微微點頭，無乜眼神。
Q：「你哋嚟緊係同班同學，多啲認識下啦。」
我：「病咗，無事嘛？」所以托QQ嚟帶狗？
Z：「唔小心凍親…」
我：「吓，而家暑假大熱天時凍親？」都唔奇嘅，有錢人開大個冷氣如果瞓覺戽被，又或者個雪櫃大得滯懶得攞啲嘢出嚟食而自己走咗入去食嘅話…
Q：「人哋啱啱喺澳洲Melbourne返嚟呀。」Zilvia個樣有啲尷尬，而QQ就幫佢解答。
我：「乜澳洲會凍啲㗎？聽聞歐洲都熱浪吹襲熱死人。」
Q：「你，有無上Geogar堂㗎！澳洲喺南半球而家係冬天嚟，分分鐘雪都有得落添呀！」
我：「咦，又好似係喎，夏天係澳洲嘅聖誕節。」
Q：「真係俾你激死，係聖誕節嘅澳洲係夏天嚟呀。」




我：「嗯，係嘅係嘅，希望妳早日康復，呢隻係…拉布拉多？」好彩我唔驚狗，因為我阿爺度都有隻無用唐狗。
不過大到咁嘅狗…但靚女養嘅就應該安全嘅。
Q：「大過拉布拉多呀，呢隻係大瑞士山地狗。」有錢人戴瑞士錶，窮人食瑞士糖，傻人買瑞士山區肺，估唔到養狗都要養隻瑞士嚟嘅。
不過隻狗係好靚仔嘅，全身都係棕黑色嘅毛，心口同面係純白，交界同前腳有啲咖啡色點綴，大得嚟神情又可愛。
我：「咁呢隻狗狗叫乜名呀？」
Z：「佢叫做彼拉多。」佢好斯文咁介紹自己隻狗。
我：「個名咁拉布拉多feel嘅？」
Q：「有乜關係，咁你唔好叫爽，叫呀仁就啱喇。」
我：「你好呀，彼拉多！」Z：「唔好呀！」
已經太遲，我諗住扮friend咁踎喺度同隻狗打招呼，點知一講完佢個名就已經㩒咗上嚟我心口，而由於佢太重嘅關係我直接向後冧低瞓咗喺條路上面，彼拉多就不停咁用條脷舐我塊面，Zilvia當然扯都扯唔住佢。




Z：「嗶…嗶嗶！」傳嚟幾下哨子聲，隻狗即刻坐返低。
不過，我塊面已經俾佢洗乾淨咗，Zilvia好唔好意思咁抽咗一張濕紙巾出嚟畀我抹。
Q：「低B…等你以為自己好受動物歡迎吖嗱。」QQ伸手拉返我起身，希望…Zilvia佢唔會諗多咗啦。
我：「唔係呀，佢…彼拉多…應該係非常歡迎我。」
Z：「係呀…佢係咁…好鍾意同…小朋友玩。」
Q：「彼拉多歡迎你…以為自己係耶穌咩？」
我：「當然唔係，我係強盜巴拉巴。」
Q：「你…識嘅？」Zilvia個樣變得有啲尷尬。