為了實現媽媽遺願，我成為了女兒國唐僧: K141

我：「妳又喺度彈豬可愛呀？」
Q：「有人點吖嘛…我諗緊可以點換手嚟做可愛動作。」
我：「睇嚟妳收咗錢都真係會做嘢㗎喎。」
Q：「大佬，直播唔係鐵飯碗嚟㗎，無人睇就無錢收。」
我：「妳都唔係第一次彈啦，佢哋都真係幾悶下。」
Q：「我寧願佢哋悶…唔好諗埋啲咁新穎嘅嘢嚟考我。」
我：「咁有邊啲難搞嘅曲目呀，睇下我識唔識？」
Q：「Ado嘅Usseewa，Hololive嘅今晚萬聖節，東方嘅history of the moon，無聊啲嘅有IVE嘅after like，Black Pink嘅…我都唔記得咗係乜。」
我：「欸…好似去咗另外一個世界咁。」
Q：「嗯，好在我講到明唔彈classic，如果唔係會更加大鑊，都唔知啲仔會鍾意玩乜無聊嘢…嗱，呢首你識嘅。」




我：「噢！係諸葛亮party！夠晒毒呀。」
Q：「你對佢哋有乜期望喎，平時係聽呢啲㗎啦。」
我：「無乃木坂嘅？妳唔係話過有個fans鍾意咩？」
Q：「佢去咗旅行嚟唔到，悲痛萬分，我都幫唔到佢。」
跟住嘅晏晝佢又喺度同啲樂譜搏鬥，由於係練譜，有啲彈唔好嘅位佢要係咁repeat，又會甩漏，可能驚煩到我就帶住耳塞練。直到五點到佢無端端換衫。
我：「咦，妳出門口呀，咁錯蕩戴胸罩嘅？」
Q：「你係咪廢話呀，係咪想俾人閹？」
我：「妳…男朋友返香港，妳去接機？」
Q：「未呀，佢重要玩多幾日先返嚟…」
我：「妳去做運動？」佢又著返條瑜珈褲。




Q：「嗯，做乜呀，你想跟埋我去？」
我：「我去，可以咩？但係我都唔知要去邊。」
然後QQ低頭沉思咗五秒：「都可以嘅，普通嘢嚟啫。」
既然佢講到咁，我又無理由唔跟佢出去嘅，落到街佢就帶咗我去搭巴士，係一架去尖沙咀嘅巴士。
我：「少有喎，竟然有地鐵唔搭搭巴士？」
Q：「無計啦，嗰度個個站都唔近㗎。」
我：「妳唔係去尖咀咩？」我諗住佢有嘢要買。
Q：「唔係喎，去尖咀大概都唔會咁著啦。」
我：「唔通…妳想帶我去見妳媽咪？」你問我見家長擔唔擔心？少少咁啦，原因係我根本就唔係佢個女嘅邊個，只係一個俾佢搵緊笨嘅好同學兼朋友啫，而且又見過佢媽咪，感覺都係傻傻哋無乜長輩嘅壓力，如果有機會睇佢兩母女嘈架應該好得意，但請…唔好接走佢。
Q：「你都黐線嘅，我先唔想理個麻煩嘅女人。」




喂，好歹嗰個都係妳阿媽…我想搵我嗰個都無得搵。
我：「咁我哋而家係去邊度，使唔使搵人？」
Q：「咁驚做乜，嗰個人你都識㗎，係Zilvia呀。」