為了實現媽媽遺願，我成為了女兒國唐僧: K126

Q：「梗係黑桃王后嗰邊啦，營收高好多㗎。」
睇怕越頹廢嘅人就越容易燒錢，識打機嗰啲可能都會計過度過，有得同QQ玩下先會課返咁上下。
我：「點回饋法呀？送大尺度相定係原味內衣？」
Q：「衰得你吖，成個腦就剩係識諗呢啲嘢。」
我：「我都係配合返妳啫，妳唔係唔知自己用乜吸客。」
Q：「唔啦，我無所謂，但做得太爛返唔到轉頭，縱壞咗啲人到佢哋覺得唔夠甜頭就唔課㗎喇，我諗緊，不如整返個見面會，順便搞個迷你演奏會，同埋聚餐咁。」
我：「呀妹妹，妳係咪唔記得咗妳係個無樣嘅直播主？」
Q：「我直播唔出樣係因為怕熟人認得啫，而唔係怕街外人見到我個樣，咁我唔會公開俾人join嘅，一定要喺課金榜度有位置，同埋俾我認證咗真人樣我先會邀請佢哋，絕對唔會話請咗個傻仔健過嚟咁樣…不過我係驚有人影相，而且按道理我都要同佢哋影下checki嘅，所以可能要諗辦法遮一遮。」
我：「呢啲…妳覺得安全就得啦，唔好到時攪到全校知妳做直播女神就大鑊，如果妳再玩多次傻仔健，我諗佢反肚都似。」
Q：「吓，我覺得佢化㗎喇喎，應該玩到佢死去活來都重得，最多好似隻貓仔反轉咁肚仔向天。」




我：「有咁易化就好呀，但其實，我覺得妳唔再遮遮掩掩，堅做KOL嘅話都有得做，而家呢行乜人都有，連千金小姐都有，到真係紅咗Yvonne嗰啲都唔會笑妳啦。」
Q：「係有紅嘅機會…但要做個成功嘅KOL有好多因素㗎，唔係靠靚女就得，要做好多公關，賣多少少肉又會俾啲傻登仔批鬥，要好努力同埋要承受好大壓力先會成功，萬一失敗又點算，返唔到轉頭㗎喎，全世界會笑妳博上位炒粉，啲人見高就拜，見低就踩，拋個身出嚟做好容易就無咗自己，攪到成個人無晒靈魂，喺唔保證可以搵到大錢嘅情況下，我寧願好似而家咁就算，起碼我控制到個情況，又可以隨自己意願隨時消聲匿跡都重得。」
我：「嗯，最緊要妳玩得開心，錢銀上我都重可以support妳嘅，雖然只係夠妳食飯…」
Q：「好夠喇，所以我都係搵少少零用錢就算。」
QQ係一個坐言起行嘅人，諗到要做一樣嘢就會即刻plan，我首先要幫佢個大keyboard搵個手抽袋，然後佢就開始諗要招待幾多人，課咗幾多金嘅勇士先有資格，可以搞乜活動，重有場地，幾時出post做預告…
諗起都煩，對比起我嘅無腦執枱，呢份工真係唔易做。
到咗第二日佢就已經幫場地拍板，係佢以前做過嗰間女僕cafe…做熟好過做生嘛，同埋佢真係會榨乾淨任何關係。