為了實現媽媽遺願，我成為了女兒國唐僧: K104

我：「唔好同G奶溝通咁多，佢係一個變態怪人嚟。」
Q：「啊，你唔抵得呀？你都差唔得幾多㗎咋。」
我：「我意思係…男人有啲錢，就會吊兒郎當鍾意呃女仔。」
Q：「唓，你無錢咪又係遊離浪蕩想呃女仔。」
時間真係過得好快，眨下眼就到咗第二日中午。
「咔嚓。」爸：「我返嚟喇。」
我：「歡迎回家。」Q：「Uncle，好耐無見。」
呢個時候我攤喺床上面玩緊電話，QQ就睇緊書，係出年嘅教科書…因為佢已經做晒暑期功課。
爸：「睇嚟…你哋一齊生活好充實，我返嚟已經唔會再有啲乜驚喜。」
我：「返屋企咋嘛，有乜好特別驚喜喎。」




Q：「係你個仔話唔好畀壓力你，一切維持原狀。」
除咗QQ兩粒飛釘唔見咗，同換返條遮到大髀嘅褲。
爸：「咁就最好，你兩個乖乖地開開心心就得，唔需要畀啲乜驚喜我，例如返嚟見到再多一個女仔…」
欸，搞乜鬼，做乜講埋啲咁驚喜嘅嘢，我何德何能喎…
Q：「我就無乜所謂嘅，唔知佢又敢唔敢呢？」
我：「定係你有驚喜帶返嚟？例如CPU或者RAM？」我即刻劖亂歌柄，唔俾QQ再講廢話落去。
爸：「邊有咁多…harddisk就大把，唔夠快而家無乜人用，海關充公完都拍賣唔出，得嗰兩三TB連佢哋自己都懶得拆嚟用，但係好重呀…」
Q：「啱用呀，你個仔成部電腦都係嗰啲，多得一TB都係一TB，少少無拘…」女神同爹地熟咗好似想煮死我咁…
我：「係囉！而家啲卡通全部都超高清！但…harddisk真係太慢喇，播片會窒，會唔會有SSD？」
爸：「你當人哋個充公倉係centralfield咩，魚肚啱唔啱？不過就連我哋都唔敢攞返嚟，只會喺船上面自己煮或者暗坎益啲VIP，SSD而家唔算貴啦，自己去黃金買。」




我：「呢個女仔話佢啱貂皮，虎皮，熊皮或者鱷魚皮都得，實在係十分之殘忍。」
Q：「你咪癲啦，喺咪想你爹地坐監呀…」
爸：「見到你兩個咁精靈就知過得好好…點呀，食咗晏晝未？」
我：「有大人返嚟，梗係由你負責返。」太感動喇，都唔知有幾耐可以唔使自己處理食乜嘅問題，而家我又可以做返個乖乖等開飯嘅小朋友。
Q：「呢條友仔罷工…我隨便食就得，無要求。」
我：「如果你想挑戰嘅話可以教佢煮嘢食㗎。」
爸：「無謂強人所難啦…我為你個肚著想，唔想你入廠，睇急症嗰一百八十蚊夠食好多嘢㗎喇。」
Q：「喂呀，我識簡單整畀自己食㗎。」