為了實現媽媽遺願，我成為了女兒國唐僧: K100

嗰晚，我上網打G奶同甜故做關鍵字搜尋，的確好易就搵到佢嘅甜故，有一篇係講發綺夢嘅，喺夢中佢俾以前三個女神級中同玩到死去活來，差唔多精盡人亡，但就偏偏鍾情一個唔起眼兼唔靚女嘅中同，佢嘅形容係瘦底平胸輕骨感，男仔頭硬朗倔強…咁…似乎係搞基多啲喎；即係你同我講，有QQ，公主，Angel我都唔食，剩係想去食細蚊一樣…咁細蚊我又真係食過，實在諗唔到呢個係乜諗法嚟；雖然我係極之唔想話細蚊唔好…
奇怪嘅係一篇咁寫嘅文竟然都有幾多人睇。
小弟唔識欣賞，而且寫好多字都未入正題，結果我入夢。
我：「Queenie，咁我換衫出去交收，麻煩妳洗碗喇。」
Q：「得啦，放低，我一陣就會洗。」
我：「交收完我會同阿健去踢波，可能食埋晚飯，妳今日有無嘢做？想唔想一齊食或者等我買返嚟畀妳？但跟住我就要去開工。」
Q：「咁呀，唔使啦，我約男朋友，橫掂放假得閒。」
我：「同埋…我爹地聽日返嚟，妳有個心理準備。」
Q：「哦，無特別呀，我會乖乖喺屋企等開飯。」
又係嘅，QQ入得睡房，出得廳堂，靚女得嚟又叻女，識同人相處，點會怕我爹地吖，佢係唔入得廚房啫。




我手上呢個四十九key keyboard當然輕過新嘅八十八key好多，加埋有袋抽住運輸其實好方便；再見喇，半年前乜都唔識花盡九牛二虎之力收你返嚟，而家有個繼任制替代你，希望你可以換到個好主人啦，我永遠都唔會忘記QQ第一次見到你嗰個興奮嘅表情同埋經你奏出嚟嘅音樂。
當然我都有用你玩過下電腦game，但玩咗一排就覺得呢樣嘢唔係幾啱自己，不過我都會唔捨得你。
去到南昌站某出口，我都未得閒send TG畀條友，就已經有個大哥哥因為見到我手中巨物而向我揮手…放心，只要有QQ喺度我都會keep住係異性戀，唔會令呢個亂七八糟嘅故仔亂上加亂。
G：「唉，就預咗佢唔會親自嚟…」係呀，失望樣嚟。
我諗…叫佢哥哥應該好啲掛，做酒樓嘅我都好清楚無乜客鍾意聽到人哋嗌佢叔叔姨姨，除咗嗰班打躉賭徒大叔…但明明我就係細路仔嚟。佢望落應該廿幾三十歲到，斷估重大過我個無鬼用班主任，按照呢個道理，Miss Tang下年唔再教我係咪就可以嗌佢做姐姐，假如我唔驚俾人罰企。
佢嘅衣著好輕鬆，感覺就係瞓瞓下覺落樓下交收嗰隻，上身一件透薄頹feel白裇，頸口兩粒鈕無扣，我諗女仔睇到會覺得性感；下身就係一條煙燻墨綠中腳馬球褲，加對鴛鴦色無襪帆船鞋，唔好諗錯咗係兩隻鞋唔同色，而係比奶茶色深少少，比咖啡色淺少少嘅鴛鴦色。