thriXt Qantasy 純文字安眠之作 (New: - U2K - 一直上架): K94

Q：「唓，你估我攞唔到咩，先嗰少少嘢。」
就係咁，好快就行到返屋企，當然入大廈前都有左右望下；始終朋友一齊約去街無傷大雅，但如果女神登門入室實會惹嚟流言蜚語。
忙完一大輪，佢入廁所整理，我喺廚房洗手，順便快手淥多幾條菜，然後就一齊開房…呀，唔係，係開飯，呢啲就係我哋放假嘅日常；食飯盒有樣好處，就係唔使洗鑊同洗碗，淥菜嘅煲同碟過下水就搞掂。
Q：「我去沖涼先，你去幫我開箱啦，唔好整爛個包裝呀，如果有乜問題可以攞去換。」
妳唔好咒我啦，如果要再運多兩次我會想死㗎…
我：「放心啦，你見到我啲LEGO盒就知我係直角魔人嚟啦。」鍾意砌嘢嘅人，通常都唔會用暴力對待物件。
鎅封口膠紙，開箱抽起，除紙漿套，拆膠袋…由四十九粒制變八十八粒制真係長好多，好彩QQ無要到workstation，如果唔係真係唔知點放，呢部都話打直戙高唔會太大難度；然後我小心翼翼咁放喺兩張凳上面，插埋電話就見到個mon著咗燈，最後放本都幾厚下嘅說明書喺梳化度，可以等QQ沖完涼出嚟試機；話咁快佢就出埋嚟…其實係因為我開箱都用咗成十分鐘。
我：「女神，妳可以試機喇。」
同平時一樣，佢喺電話打開個app，琴聲就出嚟嘞。
我：「還好嘛，係咪一切正常？」




Q：「睇落係，試晒八十八粒制先。」跟住佢用右手行樓梯掃key，大約十幾秒就行晒，然後換細力又再行返落嚟一次，啲聲就變成柔和啲。
Q：「全部出到聲，感壓都無問題，喂，做乜唔幫我駁埋個pedal㗎，呢個yamaha都唔平㗎。」無錯，佢打劫多人哋一個腳踏，由之前個膠踏變成一個金屬踏。
我：「係，係，咁個keyboard係咪OK喇，呢個盒真係無可能長期放喺度…」
Q：「嗯，佢廿七萬樣功能…放一晚啦，我試埋啲會用到嘅制先，你知啦，打機啲手制都會壞一粒制。」新制無咁易嘅，二手制九成壞圓圈或者交叉，一係蘑菇自己飛。
我：「其實佢多咗啲乜功能？」
Q：「我都係當佢普通琴用啫，多咗…一啲tracking同short cut map嘅嘢，我諗唔會用得著，我又唔係做production又唔係玩電音，你唔明㗎喇…係呀，我有第二個更偉大嘅任務要交畀你執行。」
即係…要更加痛快啲使喚操弄我。
我：「請問我可以如何偉大咁為妳服務呢？」