為了實現媽媽遺願，我成為了女兒國唐僧: K83

我：「Sorry…係我無用，我應該一早準備定…不過妳打開嚟睇下先啦，幾時送都一樣嘅啫。」
QQ打開個盒仔，用微妙嘅眼神望住粒charm，由於只係得一粒，所以係單數無s嘅…學YY話齋QQ當然對呢啲牌子嘢瞭如指掌，從佢似笑非笑嘅面容實在估唔到佢到底鍾意定唔鍾意，要知道每一樣商品都有佢獨特嘅文化喺度，例如你送HG高達而唔係RG高達畀我嘅話，我嘅面容都會一樣咁微妙。
Q：「你…唔會傻豬到臨急臨忙仆去專門店買呀？」
嘩！女神好嚴格！原來買得唔夠精明都係錯！
我：「唔會呀…信譽商鋪嘅全新平行進口正貨嚟。」拜託千祈要係真，如果QQ知我俾人呃咗實殺埋我都似。
Q：「幾靚吖。」
我：「妳鍾意就實在太好。」
Q：「如果我無get錯，呢個應該係Cancer嘅charm嚟。」
我：「吓！吓？乜嘢係Cancer？」我剩係知末期嗰啲…
Q：「即係巨蟹座呀，英文零蛋。」




我：「係…呀，係巨蟹座，妳七月生日吖嘛。」
Q：「低B！巨蟹到廿二號完㗎！我係獅子座Leo！」
我：「呀…對唔住！係我攪錯咗…或者…我問下可唔可以攞去換？聽日嘅話…可能…」我嚇到跪喺度。
Q：「咁又唔使，你無用就梗㗎啦，其實都係差一日啫，我都有份唔算用唔著，可以接受。」
我：「點為之有份，其實有乜分別？」
Q：「其實無乜分別，我係巨蟹就鉗死你，我係獅子就咬死你，殊途同歸。」佢重要做埋手勢同口勢，好可愛。
我：「點解係都要我死喎，我都唔係好差啫。」
Q：「因為你犯賤囉，明明一開始就知道女神惹唔過，重要白紙黑字寫晒喺本週記上面。」
我：「關乜事，我又唔係做兵，我只係想妳喺呢個屋企嘅生活，可以過得開開心心…別無他求…」
Q：「嚟吖，起身抱抱。」佢拖起我攬住咗我，隨之而嚟又係一下惜惜，先係左面，再到右，最後係嘴仔…




我諗如果佢條仔睇到就實嗌分手都似，衰啲可能重會睇唔開去跳樓；至於我，心臟越嚟越強大，就算我明知而家可能喺度借啱啱同條仔goodbye kiss打晒茄輪嘅QQ嚟同佢條仔間接kiss，我都甘之如飴。
Q：「傻瓜，我喺度過得好開心呀…不過你就慘啲，明明你就可以識好多女仔，可以同人拍拖，重有得曳曳。」
我：「關乜事，應承咗媽咪…同埋妳，等我識到個十六歲嘅女仔先啦。」如無意外，明年今日就會識到。
Q：「你…其實可以去搵返Carmen㗎。」我無同佢隱瞞過Carmen同Mandy嘅任何嘢，所以佢都知道架車而家感情上可以算係空白狀態。