為了實現媽媽遺願，我成為了女兒國唐僧: K62

但我最唔能夠理解嘅係，到底街有乜好行？明明唔諗住買嘢，佢哋兩隻都可以喺間bread and butter混吉，逐行逐行咁睇衫，有講有笑…不過QQ嘅社交能力同公關又真係幾好，明明平時黐住啲富家女，但而家望落佢同屋邨妹又無乜分別。
我：「就五點喇，妳哋唔係有正經嘢要做嘅咩？」
Q：「你少擔心啦，我自有分寸。」可能…有啲男仔會好羨慕有得同女仔出街，而且重要打孖上添，但對我嚟講行街呢件事係唔會有啲乜嘢增值，尤其係佢兩個一齊喺度我乜都唔做得…
然後QQ帶我哋嚟咗一間對我嚟講好恐怖嘅地方，6IXTY 8IGHT，嘩，係粉紅色世界呀，主打賣平價女仔底衫褲，係窮家女嘅恩物，妳可以當佢係underwear版嘅UNIQLO或者H&M，等妳可以用一個相對平嘅價錢，喺一個比較舒服嘅環境，買到有牌子而品質合理嘅商品…但唔關事，粉紅色嘅世界係一件男人嘢都無嘅結界嚟㗎！
我：「不如…妳哋慢慢睇，我去睇住電器先。」如果要買電器我梗係會同爹地講，但我都諗唔到有乜地方好去。
Q：「做乜呀，你唔係怕醜呀？」
我：「唔關事嘅，我入去又唔會有乜用…」
Q：「無人要用你，你負責陪我哋咋嘛，你已經唔係細路仔嚟㗎喇，一齊睇女性內衣係好平常嘅一件事。」
我：「邊個講呀，我分明就係一個死小孩。」
Q：「你…肯定？聽聞某個女仔已經幫你變咗做男人㗎喇喎。」QQ望向細蚊，呢兩隻嘢真係…




蚊：「係囉，唔知邊個女仔咁賣大包呢？」
我：「細路女唔好亂講，跟住姐姐…佢會幫妳揀㗎喇。」
蚊：「我唔係細路女，我係女人嚟㗎！」
Q：「你就認咗佢啦，負心漢，成世走唔甩㗎喇。」
我：「邊…邊係…」我點會係負心漢喎，話雖我嗰陣對細蚊係衰啲，但起碼我無暴力對佢，又無一腳踏兩船，明明係佢自己消失，如果唔係可能都重一齊緊…但我唔敢講。
然後QQ喺細蚊耳邊吱吱唚講咗兩句。
Q：「行啦！」蚊：「陪我買底底呀！」
細蚊拖住咗我左手，QQ拖住我右手，兩個重要係十指緊扣扯咗我入去…你認為我重有可能反抗咩？其實…好爽。
係，呢個商場係唔多人，但唔代表係無，鋪頭入面有幾個女仔喺度，有兩個係類似我哋嘅中學生，有兩個似係大學生或初初出嚟做嘢嗰啲，重有個單頭OL；見到我哋咁樣入嚟當然打咗個突，就算我唔係左擁右抱，咁樣都已經好離譜，佢兩個屬性又咁唔同…吹咩！老子就係大細通殺，女神唔放過，屋邨妹一樣要臣服於我。我自暴自棄算。