為了實現媽媽遺願，我成為了女兒國唐僧: K40

QQ正一衰女包，食完豆花實行要買埋蒸…漏水喂妳飲，要講呢啲留返兩個人喺屋企先吖嘛…
健：「點解我變咗好似陪你兩個出嚟玩咁嘅？」
Q：「無啲咁嘅事，呢啲係錯覺嚟。」
其實分明就係阻住我哋兩個玩啦，如果你唔喺度我哋就可以玩多好多曳嘢…不過QQ咁樣出嚟陪我哋兩個傻仔又好似幾開心，反正對住我哋佢唔使扮嘢。
健：「天下有二難，登天難，求人更難。」佢望住QQ身後嘅一幅字畫唸唸有詞發噏瘋。
我：「求人難，溝女更難。」
健：「人間有二苦，黃蓮苦，貧窮更苦。」
我：「貧窮苦，單身更苦。」
健：「天下有二險，江湖險，人心更險。」
我：「人心險，尤以港女為極致。」




健：「人間有二薄，紙張薄，人情更薄。」
我：「人情薄，薄唔過你面皮。」
QQ望一望自己身後，個樣好似無我哋咁好氣咁。
Q：「人哋後面重有一句㗎，呢度漏咗無寫出嚟。」
健：「係？最後一句係點㗎？」
Q：「知其難，守其苦，測其險，耐其薄，可以處事矣。」好嘢，中文學霸果然所言非虛。
我：「聽到未呀，女神教你溝女呀。」
健：「好叻咩，你而家咪又係毒撚一個。」
我：「好明顯，我係有得揀嗰個嚟。」
只見女神舉起瓷碗潷晒啲豆花落口，應該想打扁我哋。




食完豆花離開士多開始上山，好多樓梯，無盡嘅樓梯，其實無乜好講，同跑大廈分別不大，有興趣自己去行。
Q：「搞乜呀你，行咗一陣就放慢晒，點溝女呀？」
健：「唔知點解，隻腳唔係幾出到力…」
我：「你連續做咗咁多日運動，隻腳一早就虛晒啦。」
健：「但明明我繼續跑步都無問題㗎喎。」
我：「跑步係用飲奶力，行山用嘅係死力，都唔同，你唔好夾硬戳個人添呀，小心抽筋。」
健：「咁點解你又可以無乜分別嘅？」
我：「以前躝街跳來跳去，呢啲石級濕濕碎。」
Q：「你慢慢行啦，我哋行先，喺上面等你，有事就大嗌。」從來都覺得QQ係食咗禁藥，平時唔覺得佢咁好體能，但要做起上嚟就睇得又打得。
我：「咁樣掉低佢會唔會唔係咁好？」




Q：「無辦法㗎喎，佢總要自己走過，如果我哋專登放慢嚟等佢，佢嘅感覺咪重難受，唔通你跑三千米會等佢？」
我：「如果唔影響名次，同佢平排跑又無乜所謂。」