為了實現媽媽遺願，我成為了女兒國唐僧: K18

然而我見到佢重著住校服，應該又係啱啱返嚟。
我：「Kuromi喺度呀，你入嚟啦。」
而佢就企咗喺門口度眼望望成轆木咁，唔知做乜。
我：「做乜唔入嚟呀？」
健：「你快啲出嚟咪得囉，我今日好似好樣衰…」
我：「你有邊日型過？咁你又有膽日日返學嘅？」
我唔理佢，摵住佢嘅衫袖拖咗入嚟，QQ亦都順勢攞咗件衫遮住佢啲Bra，遮到大半咁啦…
Q：「朋友仔，做乜咁錯蕩上嚟玩嘅？」配以奸笑。
健：「Queenie妳好，我唔係上嚟玩，我係約咗佢出去玩。」佢企得好斯文，畢恭畢敬咁嘅款，差在未鞠躬。
我：「傻嘅咩，你哋同學嚟㗎，而家相睇咩！？」




Q：「呀，唔該晒，啲數學書終於到嗱？睇下先。」
呢個Queenie，見到教科書就要即刻揭兩嘢先，重心急過男仔睇鹹書個樣，實在令人欽佩萬分。
Q：「咦，手字好靚喎，計啱數之餘重有step添。」
健：「我哋都未學，妳又知本書上手主人計啱數嘅？」
Q：「咁我成日有得睇住條仔計㗎嘛。」
我：「你而家知道乜叫贏在起跑線啦？」而我心在淌血…
Q：「本書個主人…做乜擦呢？睇到，叫…Christine Lee，睇嚟係一個靚女師姐，本書有淡淡嘅女仔香氣，做乜自己唔用讓畀個傻仔咁大嘥，幾好J喎。」
健：「因為…我要咗套無乜字跡，邊有咁多幻想。」
其實我唔會怪佢，因為實在係無乜所謂，有晒答案最好。
Q：「唔幻想，逐頁搵下可能會有電話號碼或者IG。」呢個女神計落應該未用過二手書，十足十偵探咁興奮。




Q：「健仔真係好人，託你買書真係無走到數。」
健：「咁既然妳開到口，我做個順水人情啫。」
Q：「不過呢，有啲人就話你唔應該去買textbook，而係去買…乜嘢我和女神有個地下約會，把班花推倒的絕對攻略，女學生心理生理大解密…」屌，玩邊科呀，重要將本本書講到變鹹書咁，妳快啲去做甜故作家啦！
我：「喂！喂…」我想用手封住佢把口，但喺外人面前又唔好意思有啲過份親密嘅舉動。
健：「唔明講緊乜…求下你哋唔好玩我啦。」
Q：「啲人囉，講大話話帶你去買溝女書。」我邊有話帶？明明我只係話陪佢，唔好再誇張失實啲？
健：「乜有啲咁嘅嘢嘅咩？」
Q：「有㗎，你叫你兄弟好好益下你，唔好俾佢走數。」
我：「唔好聽佢亂噏，佢喺屋企就係咁嘅德性。」
Q：「係呢，你哋約咗一陣去邊玩呀？唔會再呃我喇掛？」呢個女神擺明要喺健仔面前數臭我先安樂…




健：「我哋約咗去游水，無呃妳…」
Q：「係呀，唔知會唔會有女呢？記住叫佢分個畀你。」
我：「無呀，無女呀，零呀，妳去埋咪有囉！」
Q：「我去…其實無乜所謂，只係我唔敢去啫。」
我：「啊，做乜唔敢，妳唔係話妳游水好叻嘅咩？」