thriXt Qantasy 純文字安眠之作 (New: - U2K - 一直上架): 971

三杯落肚，大家都越嚟越興奮；然而我，只係諗緊唔想睇住QQ惜其他仔，幾時先有得散場開工，同埋煩緊點同QQ解釋Wendy嘅事。
財政姐姐先拔頭籌幫啲紙仔洗牌，最後抽咗一張出嚟打開俾大家睇，結果就係瘟神…
「嘩，原來有黑幕㗎，即抽即中！」
「呢啲叫做欲拒還迎，欲擒故縱。」
「唔係，係幹事會狗咬狗骨，精彩！」
無眼睇…瘟神佢一早就講過怕咗呢兩個靚女，好好享受。
財政姐姐將半杯啤酒咕嚕咕嚕咁吞晒落肚，再攞張紙巾出嚟好好抹嘴，然後摷咗枝唇膏出嚟補妝。
而呢個時候瘟神個樣已經好似覺得抽唔中好過…
財：「呀社長，呀唔係，呀師弟，好好玩下嘛？而家開心啦？！」財政將個右膝頭跪咗上瘟神張凳上面朘朘位夾角前面，氣勢凌人，迫迫住處男瘟神小師弟。
瘟：「唔係呀，邊有呢，師姐妳隨便得㗎喇。」




瘟神故作鎮定，鬆容面對易請難送嘅屎坑三姑…
財：「點得呢，難得有機會，梗係要好好報答下社長大人㗎啦。」佢已經用雙手摸住瘟神塊面。
瘟：「師姐言重喇，其實我都無做過啲乜。」
財：「梗係啦，因為你唔敢做吖嘛，都對咗成年啦，有乜唔怕講喎，係咪等咗好耐喇？」
瘟：「邊有啲咁嘅…」財政啜卟就整咗一下。
財：「正唔正呢？係咪已經幻想咗好耐？」
瘟：「多謝師姐…」
財：「當初做乜叫我哋兩個入嚟做幹事，吓，其實你有乜打算？」佢兩隻手指抬起瘟神下巴。
瘟：「無呀，純粹知妳哋中四幫過手…」啜卟又一啖。
財：「多謝你咁睇得起我哋喎，梗係嫌我哋兩個無好好服侍你喇，呢一年欠落嘅就一次過還晒啦。」




瘟：「夠…已經夠晒…」
財：「點會呢，我都知係我哋對你太衰，先令你嘅愛好由師姐變咗做師妹。」啜卟…瘟神塊面…
瘟：「唔好咁講啦，邊有啲咁嘅事。」
在場傻嘅都知道佢講緊嘅係QQ，而QQ就懶得理佢哋攞起咗杯啤酒呷咗一啖。
財：「有嘅，當初你肯定諗緊係咪可以一箭雙鵰，我有無講錯呢？我可愛嘅師弟。」
瘟：「我…邊係啲咁嘅人嚟喎。」
財：「想要嘅講咪得囉，明知師姐咁好人，實惜晒你㗎喎，我知你恨咗好耐喇，平時思思縮縮咁點會唔知你諗緊乜喎。」然後一嘢啜咗落瘟神條頸度。
瘟：「唔…唔好呀！師姐…」但係財政姐姐無放開佢嘅打算，一直纏住佢條頸。
財：「嗱，還晒畀你喇，你唔好同我洗面呀！」
就係咁，社長面上多咗三個唇印，條頸有隻咖喱雞。




瘟：「妳搞到我咁樣我點見人呀…」
財：「有乜所謂，你又無女，返屋企等媽媽見到開心下囉。」最後加多招言語攻擊幫佢收皮埋單。