為了實現媽媽遺願，我成為了女兒國唐僧: 964

又係嘅，如果我同佢friend到打band，其他人睇到又唔知會點諗，話就話佢出面有仔唔多care呢啲…
瘟：「爽爽，畀啲嘢你睇下吖。」
瘟神攝咗嚟我同QQ中間，遞咗部電話畀我睇。
『社長，你好呀！幸會，唔知講乜好添…』面紅樣。
『社長，你頭先球入球超型仔呀！』興奮樣。
『社長，我可唔可以直接叫你Vincent呀？』大眼樣。
『多謝你張cheki呀，你啲字好靚！』大姆指。
『你會唔會剩係理佢唔理我㗎？』淚眼樣。
『如果有機會出嚟見，不如估下我哋邊個打邊個？如果估錯咗要罰㗎！』奸笑樣。
『但係我唔係女神嚟喎，你會唔會嫌棄㗎？』菜刀一把…




兩條女十分醒目唔出樣同佢chat，不過我角度佢哋都OK嘅；我䁽咗兩眼就無心情再睇，你條友一拖二同兩個靚妹玩，我就啱啱turn down一個大波好朋友，你知唔知我心入面重係覺得好難受；所以我死魚眼望住佢。
瘟：「欸，唔該晒你，今晚食得開心啲！」
好應該呀？今年已經俾你搵咗三次笨，重要調戲我女神。
Q：「你好似同社長熟咗好多咁喎。」
我：「無呀，話晒都係隊友嚟，佢唔該我個助攻啫。」
Q：「古古怪怪咁，你真係越嚟越可疑。」
我：「無呀，大人冤枉…」返到屋企實在要好好謦下。
係喎，都要關心下阿健，最怕佢不了了知。
我：『喂，你嘅賭注點呀，有無機會？』
健：『唔知道，我哋而家成大班喺大排檔打邊爐…』




（編按：打甂爐為最考究寫法，但健仔無可能識。）
我：『勸你打鐵趁熱，難得而家重有氣氛，如果唔係第時無端端同佢講就只會更加奇怪。』
健：『鬼唔知咩，唔通當住大家面同佢講？』
我：『唔好唔記得我同你賭注係一樣，如果我輸咗嘅話早就喺球場拉去埋一角喺耳邊講咗。』
健：『我咪講咗好多次我唔係你。』
我：『即係你諗住永遠唔敢開口同女仔講嘢？以後都做毒撚？用尷尬嚟做所有嘢嘅藉口？如果你有機會都唔敢講，我會睇唔起你，以後唔好同我講女嘅嘢，我唔想理你。』
健：『食完飯先啦，我盡量試下…』
我：『祝你好運，我畀一百個膽你，人格保證你無事。』
唉，希望Bubble姐姐會幫下佢啦，如果連Bubble都專登避開佢就真係無希望，但既然應承咗我就點都相信佢。
第一味菜嚟到，係乳豬燒鵝燒味拼盤，即係最高級嗰隻！太好喇，終於唔使剩係食叉燒油雞…但係，作為貧困小朋友嘅我，淨食燒味個肚同良心都會過意唔去。




「阿姐！唔該九個白飯！」對面班餓過饑出招嘞。
「好！咁你哋呢枱使唔使呀？」姐姐奸笑望住我講。
我尷尷尬尬望住佢哋，但係無人出聲。