thriXt Qantasy 純文字安眠之作 (New: - U2K - 一直上架): 962

我：「唔緊要，佢又唔係我嘅邊個，妳唔驚人見到就得，如果唔係我可以放開手。」
W：「都OK嘅，我無男朋友，又無人追我。」
我：「我早就俾人唱到爛晒，是但啦，如果有人見到講妳妳話我夾硬嚟就得，其實妳唔受。」
W：「你都幾肯犧牲㗎喎。」
我：「我唔同妳，妳係A0乖乖女，名聲好重要，而我就算吧啦，而且我而家都唔諗住識女仔，就算其他女仔唔鍾意我都無乜所謂。」
W：「咁又係，只要好朋友鍾意你咪夠囉。」
我：「呢個…其實我都唔係太清楚。」
平時順便送佢返屋企總係覺得嘥咗啲時間，點知今日咋一聲就又返到去佢樓下，即係話今日嘅相聚係時候完結。
我：「Wendy，今日開唔開心呀？」我攬住咗佢。
W：「嗯，識咗你咁耐，最開心係今日。」




我：「放心啦，你一定會識到個珍惜妳嘅好男仔。」
W：「去邊度識，係咪你送個畀我？」
講真吖，我就唔敢介紹身邊啲仔畀佢識，佢哋都唔識同女仔溝通嘅；況且如果韻婷對佢哋有興趣一早問咗我啦，而啲仔亦剩係死剩把口話我又有自來女。
我：「呢層…要靠妳自己努力，先會幸福㗎。」
W：「你就真係要好好努力，唔好俾我見到你以後變到成隻喪家犬咁，我唔想傷心呀…」
我：「放心，我唔會俾呢件事發生。」
W：「你呀，唔準追唔到女神就嚟搵返我㗎，到時我會虐待死你，當你係兵都不如，要你追我追到去天腳底。」
我：「如果天意如此，我都唯有認命嘅啫。」
W：「包曲奇慢慢食，每日咬少少，應該夠你食到開學。」雖然言語上好平和，但我感覺到佢用盡全力抱實我，盡最後時間去感受我。
我：「非常感謝妳…對我做嘅一切，同埋心意。」




W：「重有呀，以後見到我唔准扮唔識人㗎！」
我：「點會呢，我邊似係啲咁嘅人，開學再見喇。」
W：「點知你喎，咁我…入去喇，bye bye…」
我向佢揮揮手道別，再一次望住佢入去。曾經，佢同我講過，唓，都無goodbye kiss嘅；而今日都係無嘅，初吻對一個女仔嚟講太重要，我承受唔起。希望佢唔會太過唔開心，如果返到屋企匿喺被竇大喊一場嘅話我會好心痛；不過，我相信係唔會嘅，相處咗幾個月佢都知個大概，所以一直無貿然向我表達心意而留到最後一日，就係為咗可以等大家都舒服一啲。期望唔高，打定輸數，受到嘅打擊就會比較細，最重要係佢真心明白我。