為了實現媽媽遺願，我成為了女兒國唐僧: 924

我點解會係咁諗住YY㗎？佢明明係女魔頭嚟，真係好恐怖，就好似隻病毒咁蠶食我嘅思想，要我不停咁諗起佢，好在我對QQ嘅心意好堅定…而且佢亦都唔再需要用QQ嘅秘密嚟威脅我，已經直接正式侵略我嘅心靈，睇怕佢溝仔嘅能力值都已經去到999lev；無所謂啦，好彩佢係靚女嚟啫，對我亦都唔係太差。
諗下無謂嘢，已經行到去屋企樓下，真係估唔到可以同YY吹水吹到咁夜，雖然以前呢個鐘數我成日都喺街度流連；我望下隻右手，輕嘆一聲，希望QQ瞓咗啦。
「咔嚓。」我：「咦，Queenie…重未瞓？」
佢著住條純白色嘅低胸吊帶睡衣坐喺梳化…不過呢，佢瞓覺通常都唔係著正式睡衣，即係話…
Q：「你估玩完唔使搵食呀？唔係乜都條仔出晒㗎。」
啱嘅，但我好肯定精就一定條仔出晒，希望妳唔好出卵…
我：「辛苦晒喇，咁夜都重要開工…」
Q：「點解你咁夜先返嚟嘅？」
死火，佢又有乜可能唔問我吖，話晒一齊生活咗咁耐；於是我就一本正經咁企喺佢面前答佢，雙手擺後面，好似俾先生罰企咁，俯瞰住佢嗰條比YY深嘅乳溝。
我：「係呀，今日做咗好多嘢呀，我都估唔到。」




Q：「嗯，睇嚟好精彩喎，玩咗啲乜嘢咁呀？」
我：「朝早咪去咗書展囉，原來又唔係太悶，有好多賣精品同手工品嘅攤位，呀，重有好多妹妹仔去買補充習作，哈哈…之後咪去咗食飯囉，食完…我哋又去咗灣仔電腦城睇下，睇下啲新出嘅電競keyboard，mouse，行完出返嚟…出面咪係修頓球場嘅，咪睇下人哋打波，睇睇下有人問我哋join唔join，咪一齊打波，打到夜晚見肚餓就成班人去咗M記食，佢哋都係高中學生咁，所以好好謦，一齊玩下講下笑結果就搞到咁夜。」
Q：「係呀，果然受歡迎，出去行下就有新friend子。」
我：「唔好笑我啦，吹下水啫，contact都無交換。」
Q：「咁…你就係著住呢套衫去打波？」
弊家nel，都真係有啲可疑，唯有死雞撐飯蓋，做戲做全套，㞗吹唔打稿，頂硬上！
我：「係呀，無計啦，臨時臨急打波無衫換，哈哈…」
Q：「但係，你好似無乜味嘅？」
我：「咁…呢個，平時我又唔係話好大汗，見無運動衫著咪跑少啲，同埋…喺M記吹咗兩三粒鐘冷氣乜味都散晒啦…」無錯！好合理，連自己都呃埋呀！
Q：「咁健仔佢有無買書呀？」




我：「佢…有呀，唔係去嚟做乜喎，個傻仔…買埋晒啲愛情作品，乜嘢愛情碎碎唸…女神攻略指南…我和她在學校自修室發生不可告人之事…香港女學生心理學…課室內的五種女孩，話要學嘢喎…個傻仔，我都無眼睇佢，原來而家個個都可以出埋啲咁嘅書呃錢，都唔知係咪鹹書嚟嘅，妳都可以寫返一兩本。」