為了實現媽媽遺願，我成為了女兒國唐僧: 909

我：「無囉，邊有好多幻想喎，佢本身就有男朋友啦，我諗嚟做乜…只不過可以同佢好好相處，勉強幫到佢，見到佢可以開開心心生活我就已經滿足。」
Y：「係咩，睇落好大方，好肯犧牲咁喎。」
我：「真心朋友嚟㗎，點會計較咁多。」
Y：「係咩，小心佢當你傻仔食窮你咋。」
我：「邊係喎，佢都唔係啲咁嘅人…佢…」我好想講QQ先唔會好似妳咁功利同咁衰，但諗深一層YY對我又未至於係黑心嗰隻衰，只係鍾意惡攪我為樂啫，而QQ亦唔算係一個非常純真嘅女仔，至少我成日唔知佢想點。
Y：「你鍾意啦，就算發一場春夢打下飛機都開心嘅，如果第時QQ唔再理你，我一定會好好恥笑你。」
我懶得再還擊佢，始終我同QQ嘅關係係我哋兩個人嘅私事，佢唔知好過知，反正我選擇無條件咁相信QQ。
呢個時候，佢電話彈咗兩個通知，係佢男友補讚返佢啲post，呢個年頭真係兒戲，兩個人嘅關係就係靠呢啲嚟表示熱戀定冷戰緊，我同QQ先唔會咁。
我：「你男朋友都幾靚仔㗎喎。」高大英俊過Charles，sharp過Gabriel，差過奧丁一截咁啦。
Y：「你係咪嚟搞笑？我有乜必要搵一個醜男嚟做男朋友？」一時之間我覺得佢講嘅嘢非常合理，有頭髮邊個想做癩痢？有得同女扑我都揀個靚女啦，唔通專登搵個唔起眼…但我同細蚊又真係有感情同回憶。




已經唔再係一種J動嘅感覺，而係佢成為我重視嘅人。
當然QQ係另一個矛盾，如果佢話對我無興趣我都唔知點自處，所以我從來都唔敢問佢男朋友係點嘅樣。
佢打開相簿，㧻咗一張佢同條仔嘅自拍，喺入夜嘅廸士尼入面影，背景係一座五光十色嘅城堡，佢條仔喺後面攬住佢，笑得好燦爛，我諗每一個女仔都會因為一幅咁嘅相而心動，覺得自己係幸福嘅公主。
可憐嘅我，腦海浮現嘅係兩個人嘅廸士尼門票一定好貴，亦睇唔過眼啲王子肯定佢哋背後食唔少女。
Y：「你講嘅的確唔奇，可能冷戰嗰陣佢都撩過唔少女…以失敗告終？食完玩完就算？無人會知…」
望佢個樣，要做食家實在綽綽有餘，就好似蜜絲叫奧丁中門大開隨便食女咁…但我覺得，奧丁蜜絲係好特別嘅人，可能真係可以一齊玩完都無事，但我面前嘅YY絕對唔係。
我：「使唔使審問下佢，查下啲電話紀錄咁？」
Y：「你咪又係唯恐天下不亂，我唔想攞嚟煩，只要佢肯飾演返一個好男朋友嘅角色就得。」
我：「唉，用外表嚟做擇偶標準，膚淺得嚟自尋煩惱。」
Y：「哦，乜係呀？你睇下先…」佢㧻開咗另一張相，係佢同另一個帶啲傻氣嘅男仔嘅合照，正是小弟。




嘩！唔好咁大對比得唔得？會硬傷吐血㗎，HP頂唔住…