為了實現媽媽遺願，我成為了女兒國唐僧: 907

我記得QQ都咁講過，IG係會越露越多肉。
Y：「一早就大個女啦，只係唔想俾人話啫…你講得啱嘅，遲早都要衝破第一次呢個心理關口。」
然之後佢攞晒兩部iPhone出嚟，研究點將我影嘅性感相post上IG，又順便轆咗兩嘢。
Y：「嘩，你睇下你個QQ幾唔客氣，係成斤重嘅porterhouse steak呀，點會好似你咁客氣。」
我：「我諗可能同佢就生日有啲關係掛。」
Y：「好心你啦，望到咁高，遲早跌死你呀。」
我：「都話我同佢只係普通朋友…」我好想講佢平時喺屋企都唔係咁，但對住YY幫佢平反亦好無謂。
Y：「你鍾意就得，咁揀邊張相好？」
我：「就呢張啦。」我指住佢無望鏡頭，稍為低頭，口咬橡筋圈雙手撓後整頭髮嘅一張相，雖然無舉高手嗰張咁爆，但個心口同埋胳肋底都係表露無遺。
Y：「你肯定？我其實有啲怕醜…」




我：「喺我心目中妳係一個完全唔知個醜字點寫嘅女仔…」
Y：「咁係因為你啫，平時又點會咁呀，邊似得你，抱住人哋條女好似想食埋人哋咁，我係奧丁就唔忍喇。」
我：「吖，點解妳唔諗下係佢唔看實個老婆放佢出嚟食咗我咁，我只係盡量配合下佢。」
Y：「知你哋兩情相悅喇…點呀，張相使唔使執下？」
我：「唔使，簡單就好，或者可以tune下啲光暗。」
佢輕微咁較暗咗少少，再將四隻角打陰影就出story。
Y：「唉，都唔係幾知自己做緊乜。」講完佢就熄咗個電話mon嘆氣，變返一個正常為感情煩惱嘅女仔。
「叮叮。」我：「睇下，即講即到。」
Y：「未必嘅，分分鐘係你個QQ串我…」
我：「點呀，呢個係咪妳條仔嚟？」我指住個通知欄。




『妳去咗船P？』係一個男仔嘅頭像配兩粒英文字。
Y：「係呀…我應該點覆佢好？」佢轆大眼珠望住我。
我：「關你撚事咩，柒頭！咁樣。」
Y：「你係咪好想我分手先安樂呀？仆街！」
我：「Sorry，一時之間呷醋係咁，講下笑啫…等等，千祈唔好開對話框住，唔好俾佢見到妳諗好耐點覆，而且拖返佢一分鐘先，唔好秒覆佢。」黐得女人多，學晒佢哋啲衰嘢，所以我亦唔會care佢哋對我用相同戰術。