為了實現媽媽遺願，我成為了女兒國唐僧: 900

女仔總係鍾意問埋呢啲死亡大問答，一日唔答錯佢哋都係唔會安樂嘅…不過我諗佢哋心入面嘅競爭其實都好大，平時對住份考試卷嗰一兩分高低都要攞出嚟講，又邊係我呢啲與世無爭嘅凡夫俗子可以體會到㗎。問題係我唔想諗但唔到我唔諗，我都想聽日可以喺Bubble姐姐面前擊敗阿健，想成績可以追過埋佢然後貼近返QQ，而唔係剩係識叫做溝小小女同跑得快過佢。不過人比人又真係會比死人，望住團長同奧丁呢啲我就好清楚明白自己應該快啲死返去洗洗睡，無謂作太多不切實際嘅幻想。
我：「我有聽過佢彈琴，咁…梗係妳嘅好聽啲啦。」
Y：「認真答呀，唔使驚我罰你喎，講真話就得。」
我：「欸…妳又唔係唔知我唔識音樂嘅，件樂器又唔同，不過…妳嘅音樂好似正經啲？QQ令我有一種隨心嘅感覺，聽聽下好似會消失咗咁，有時會聽到瞓著，呀，呢首幾好聽喎，慢得嚟好舒服，我記得QQ都彈過。」
Y：「傻瓜，呢首係somewhere in time，好浪漫嘅。」
我：「嗯…時間嘅某一處？某段時間…」
Y：「係似曾相識呀。」
似曾相識？望住呢啲女神，其實從未認識，以為佢哋扮晒嘢，點知原來咁實在；以為佢哋會對我不屑一顧，回首發現自己都帶住有色眼鏡；一個女魔頭點解可以拉到呢啲舒服到完全唔配合嘅音色？實在係太難以明白…
喺YY嘅配樂之下我哋輕輕鬆鬆食完成餐飯，埋單五百幾，算係幾好味啦，應該點都平過食龍蝦；諗起佢哋啲男朋友成日要請佢哋食呢啲飯都覺得幾陰功，錢又未識搵，唔通真係隨口嗌聲媽咪就會有糧出？如果要我同佢哋拍真拖，一個月四五餐就清咗我袋，拍條毛咩…
唔經唔覺攪到咁夜，呢個鐘數返屋企無乜好處，我索性拖住佢隻手開開心心拍拖行下商場。




我：「YY，入唔入去玩下呀？」行行下經過間冒險樂園，平時我又點會嘥啲咁嘅錢，而家既然無所事事同佢喺度消磨下時間都好。
Y：「好呀，嗱，會員卡喺度，入面有幣㗎喇。」
我：「嘩，有成七百幾個幣…剩睇張卡都係富婆。」
Y：「唓，又唔係我啲錢，條仔諗唔到送乜畀我咪打一百個幣入去囉，而且我阿媽都會玩嘅。」
好唔慣呢種感覺，平時嚟到通常都係兜過圈睇下啲靠收租同勒索家用嘅阿婆喺度玩推銀，睇下夾公仔機有無死雞執，小學嗰陣重會䚎下機底有無人跌銀，去出飛口扯一張尾飛出嚟，甚至用念力令到推銀機自己跌銀，儲兩三日都或者夠換枝鉛筆…不過後嚟轉晒用卡就無咁好玩。
有時爹地返嚟都會唱一百蚊畀我去玩嘅，不過咁樣反而無咗喺度遊蕩嘅樂趣，而且我寧願用一百去買自己想要嘅嘢。