為了實現媽媽遺願，我成為了女兒國唐僧: 884

A：「你哋唔好咁啦，奬品呢啲…我叫Helen準備啦，咁樣滿意未呀？」總覺得係佢先使得郁Helen姐姐，呢兩個人嘅關係實在係謎一般。
A：「呢度有一疊紙，我一陣會問女朋友嘅問題，各自喺度寫答案，如果一樣就有分。」仆街，玩埋啲咁嘅嘢你叫我同YY情何以堪？！
Y：「諗得簡單啲，直接啲，我都幫你唔倒…」
喺甲板上面，我哋男同女被分開咗打對面坐，其他嘅人仔就準備喺度食花生。
A：「好！第一條，女朋友鍾意乜顏色？」
頂，點解YY好似未卜先知咁嘅？唔通玩過？
嗰對橙色布包住嘅波仔又真係幾好揸嘅，我諗Charles都會有同感，而且視覺上好sharp。
我哋都輕易咁答到，除咗…
丁：『狗仔色。』絲：『不可以色色。』
只可以話佢哋論玩嘢都係夫妻一條心。




而啲細嘅睇到佢哋答案就笑到見牙唔見眼。
H：「喂！奧丁你唔好再喺度教壞師弟妹喇喎！」
丁：「Helen媽妳係咪眼花？我呢度係想講佢鍾意我哋養嗰隻柴犬岡本嘅顏色，即係白色同粟子色相間，妳到底諗咗去邊？個個女人都係咁，不如妳去話下佢個答案先，我思想不知幾健康。」
到底…點解要叫自己隻狗做岡本…而當然，班花生友就笑得非常之開心。
A：「第二條，女朋友嘅生日日期！」
屌，我撚知咩，就連QQ我都唔知啦。
其他人已經寫緊，我望咗YY一眼，好似明咗啲嘢…
我：『佢唔肯講，因為要我日日都對佢咁好。』
Y：『年齡係女人嘅秘密嚟。』
A：「欸，真係難搞…按道理要畀返半分嘅，其他人都好正常呀下，咦…但係點解蜜絲寫十六號奧丁寫十九號嘅？」




丁：「吓？！乜妳係十六號嘅咩？」
絲：「食屎啦你！」睇怕係真心記錯。
丁：「咁應該都有半分呀？反轉咗啫，男仔同女仔睇嘢通常都相反㗎嘛，你六時…我咪九囉。」
我開始分唔到佢係咪特登錯，總之就無分啦。
A：「第三條，定情嘅地方！」
定條毛咩，我連佢同班同學都唔係，可以話只係叫做識咗個幾月，又唔可以答係呢條船開始。
但我見到YY已經喺度寫緊，咁…死就死啦。
我：『Z字頭嘅一間熱狗店。』
跟住YY笑一笑，揭開咗佢嘅答案，中呀！雖然佢嘅係全寫，而公主兩個就係一大抽唔識讀嘅英文字，我諗係高級法國或者意大利餐廳掛，Queenie佢哋亦當然唔使諗係學校band房，最後…
丁：『兩歲嗰陣香港屋企嘅雲石浴缸。』