為了實現媽媽遺願，我成為了女兒國唐僧: 879

我：「係啦，識溝女嘅男仔明知妳係純情，重點會擺個鹹濕樣出嚟令妳避忌喎，有無聽過欲擒故縱呀，只要令妳想要先，等到機會就做乜都得啦，邊使求公主派兵糧呢？」
P：「喂呀！邊係公主喎…同埋我又唔係真係咁純情，只係佢實在係令我覺得唔自在。」
我：「如果妳係頂唔順咪同佢講囉，佢愛妳嘅話應該會收斂返啲㗎喇，唔使太在意佢係咪鹹濕，個個都係咁㗎啦，妳係佢女朋友，都可以諗下點幫下佢解決嘅，係咪？如果唔係佢做乜要搵妳做女朋友喎，小心俾其他女搶咗呀，到時唔好喊。」
P：「呀！好煩呀！好似做乜都錯咁。」
我：「早日失身，可以令妳脫苦海。」
P：「咪派山埃喎，我好驚會後悔呀。」
我：「咁細個就係會犯錯同後悔，我自己都係。」
P：「你個EX有無好憎你呀？」
我望住佢輕輕咁擰頭。
我：「我覺得，只要諗返起自己嘅第一次，我同佢嘅腦海就會浮現返對方個樣，就無乜好後悔，所以佢鹹唔鹹濕根本唔係重點，或者佢想鹹足妳一世呢，但如果佢係（口趙）完鬆嗰啲人，咁就唔好嘞，妳重有成年時間去搵個答案出嚟。」




P：「咁你嘅意見呢？」
我：「我覺得佢係傻豬嚟，妳應該臣服到佢嘅，公主小姐，佢點都安全過Gabriel，奧丁同我。」
P：「哈，好似呢句最中肯…不過，你哋應該無乜所謂？好羨慕你哋可以相處得咁好，咁自然。」
我：「唓，我哋鬧架嗰陣妳睇唔到啫，嗰隻YY變態起上嚟呢…」呢句真係唔係大話嚟囉。
P：「不過睇嚟你已經俾佢臣服咗。」
我：「點都好啦，都一齊咗…要快啲撐返去啦，如果唔係怐到見到古拿比加。」
P：「你喺度講緊乜？」佢個樣一頭霧水。
我：「呢啲嘢女仔唔識㗎喇。」
P：「如果唔係有男朋友，我都想識你多啲。」
我：「吓…但我有女朋友㗎喎。」至少今日嚟講。




P：「嘻，我無話過我好純情喎，係唔想乜咋嘛。」
我：「唔好啦，其實我係專呃蝦條嘅壞人。」
P：「唔信，你唔捨得令女仔傷心嘅。」
我：「所以…我唔可以傷YY嘅心。」
P：「男人唔係成日話唔俾女方知就得㗎喇咩？」
我：「呢個唔知啫，嗰個知吖嘛。」
P：「嘻嘻，我係飲多咗先亂講嘢，平時唔係咁。」
我：「嗯，我明白，唔使介懷。」
P：「其實好多謝你，平時呢啲嘢都無得同人謦，同女仔friend講就會話我曬命，同男仔講就只會叫我飛咗條仔去考慮佢哋，而又更加無可能同大人講。」公主，係喺受保護之中長大，唔似得太卡車呢啲暴風少女乜都經歷過，而且又肯同我分享。