為了實現媽媽遺願，我成為了女兒國唐僧: 850

我：「咁又係，可以輕輕鬆鬆玩傻下傻下都幾好，對住女朋友佢就應該無得咁。」
Y：「佢如果真係想溝女就點都溝到㗎啦。」
Q’：「傻下傻下都有大學搶住收嗰下先犀利，聽聞話如果佢讀得嚟可以俾佢double degree，到時入到U睇怕又係一場腥風血雨，希望啲組媽同組女唔會為咗佢大打出手。」
女仔講男神，從來都唔輪到我哋男仔出聲。如果佢咁受歡迎其實會唔會覺得麻煩呢？就好似有時Wendy黐住我都唔知點算…但佢嘅話又點會沉迷女神吖，極有可能係開放play願者上釣，來者不拒，當你越唔在意，啲女就越嬲你唔落。
係咪咁？好似係。瘟神食完檸檬咪又肯劏埋個肺出嚟畀QQ，所以根本唔使對佢好。
我都好想不羈咁左擁右抱女神，但現實呢…我要服侍兩個有仔嘅女神，重要俾人當玩具。
Q’：「自摸，混一色，南風，正花，六番位位三十二，冧莊。」睇嚟開始認真喇喎，講真有二千蚊做底輸贏三四番不如唔好食啦，都無感覺，就好似QQ而家喺屋企著住校服坐得樣衰我都懶得睇，縱壞咗。
P：「Yvonne唔好意思，對對糊，雙番南，無花，六番六十四，多謝晒。」對對糊，好難估，出銃都無辦法；錢銀事少，佢已經第二杯。
Y：「混一色，白板，唔該Queenie。」傻豬嚟嘅，咁急做乜呢，四番得十六蚊咋，拆白板搏一鋪都好吖，重有成半牌未摸。
Q’：「吖，衰豬，妳係想請我飲酒咋掛？」




Y：「嘻嘻，唔使多謝我…」無眼睇…
絲：「自摸，平糊，正花三番，食細啲費事益啲衰人。」嘩，快到咁，摸咗十隻牌多啲咋喎。
而家個勢重係我哋落後緊，Queenie同蜜絲應該差唔多，如果輸比奧丁應該當無嘢，Gabriel都OK嘅，是但啦，佢又唔係我條女，亦無寄望過佢幫我贏對波返嚟畀我揸。
今鋪到我哋南風尾莊，小公主揼到我哋九章…
Q’：「妹妹，九章包自摸㗎喎。」
每次聽到女仔講自摸，我都會有少少興奮…
P：「知道嘅，希望唔會啦。」
有樣嘢叫金玉其外，敗絮其中，入面四隻牌得一隻啱色，一隻字，都焗住做清一色，有排玩。
即係話攞啱牌就基本上無得扣，無得轉，一係棄糊，但就通街都知，一係焗賭。
P：「嘻嘻，唔好意思，唔係得妳做清一色，清平八番二五六。」




人哋掟到妳九章，即係話佢啲牌都唔會差，妳重要乜牌都打，係極之易出銃。
啱啱見Charles已經特別緊張咁，YY一出銃佢直頭雙眼發光，好似重開心過公主咁。
丁：「噢，我嘅波波無咗了。」
G：「這些機會不是屬於我們的。」
Q’，絲：「自己又唔係無，咪隔籬飯香啦！」
G：「咁真係得好少吖嘛…嘩！吖唷…」你哋醉喇…
C：「Yvonne…今次…真係唔好意思，多謝晒。」
Y：「嚟啦，客乜氣，肉隨砧板上，有乜所謂。」