thriXt Qantasy 純文字安眠之作 (New: - U2K - 一直上架): 832

我：「所以，而家就好好捉緊Queenie喇。」
G：「捉唔到個beat，如果可以，就等佢捉返住我。」明明你兩個睇落就應該喺埋一齊啦，有幾難捉？點都好過我估我個Queenie每日開大定細。
G：「哈哈，驚你悶變咗迫你聽我呢個老人家講廢話，希望你唔好介意。」
我：「唔會呀，而且，當我喺架船上面望住個海，我就唔會悶。」因為，爹地呢個時候都喺另一架船上面同我望住同一個海，而媽咪就喺藍色嘅天空上面守護住我哋，我相信係連成一線嘅。
我：「你…喺度搞乜鬼？」佢將幾包香腸拆開咗，一紅一白間住咁排喺個盤上面，鬼死咁精美…而啲腸就當然唔係廚師腸啦，你哋明嘅。
G：「啲女食嘢前實打卡㗎嘛，砌靚啲等佢哋影相放IG囉。」
我：「哦，既然係咁嘅話…」我打開幾包肉丸。
於是我將嚟自台灣新竹嘅貢丸，嚟自長洲嘅特大魚蛋，嚟自大埔振興嘅牛丸、墨丸、芝心丸用三角形緊密排列整咗個蜜蜂竇出嚟。
G：「你都幾好手勢㗎喎。」
我：「我無嘢叻，最叻就係做無謂嘢。」




G：「哈哈，雖然未必有機會同你再見面，不過感覺上同你做friend都係一個好選擇，Xavier。」
我：「講呢啲…咪咁老套啦，我只係閒人一個。」
G：「如果你係我同學實捉埋你嚟玩band。」
我：「咪玩啦，我連結他有幾多條線都唔知。」
G：「玩下玩下就識㗎啦！好喇，叫佢哋上嚟先。」
「唔屌到你，以為自己好撚型，屌那星，You know what the fuck i'm saying，冚家拎，冚家拎」呢班細路，實在教我佩服得五體投地。
H：「喂！你班死仔唔准喺度唱粗口band啲歌呀！」難得護士姐姐重有氣力同佢哋周旋…
「唔係粗口band呀！佢哋係英雄嚟！」
H：「都唔准呀！大個啲先准聽！」
「Helen姐姐呀！佢哋係咁播鶻突歌呀！」呢啲團體通常總有啲帶住潔癖嘅麻煩妹妹仔。




G：「上面個場set好咗㗎喇，肚餓可以上去先。」
H：「好啦，妳哋上去先，唔好理班衰仔。」
「好行唔送，我個肚重有個牛角包喺裡面。」
「其實我都食咗餐蛋麪先嚟，呵呵！」
「Hey！你老竇嗦茄！」
估唔到班死仔包只係玩咗一陣，就攞住枝結他同埋bass玩得似模似樣，雖然音符係少啲，但起碼唔覺得係噪音嚟，可能玩開音樂真係唔同啲。
「得嗰幾枝燈又點樣睇到你全相，全場黑鼆鼆，豬扒都可以變女神！唉…遠睇誇啦啦 , 近睇吹喇叭！」啲女仔上咗去之後，佢哋成堆較暗埋啲燈，開住個電話電筒當正呢度係私人disco咁。