為了實現媽媽遺願，我成為了女兒國唐僧: 810

我望住Yvonne，佢好似早就知道我嘅疑惑咁。
Y：「佢係我哋嘅團長，叫做Alfonso。」
我：「團…團長？」竟然連希索加都唔夠…再加多個古羅洛，我想講句走先啦，係咁先啦…
Y：「佢係我哋嘅指揮嚟，好有才華㗎，一早已經俾中大音樂系預先取錄，嚟緊就會升year 1。」
可唔可以，give me a break？！
我：「指揮…即係攞住枝棍仔攉下攉下嗰個？」
Y：「唉，邊有咁簡單…唔止㗎，佢會彈琴同吹色士風，重有識作曲…而Queenie呢，就係拉viola嘅，Gabriel就負責打大鼓同鈸。」
我：「拔？」敗家仔唔識呢啲都好正常吖…
Y：「即係你哋所講嘅鑔鑔呀…」哦…嗰塊大餅。
G：「Sorry呀，呢邊我係嚟替工做兼職㗎咋，我正職係喺學校夾band。」




Q’：「算吧啦，我一日喺度你都無得走㗎喇。」
G：「咁都係兼職嚟，呢邊隨時企十分鐘先敲得十幾下，平時我一秒可能已經係呢個數。」
Q’：「你鍾意啦，無幾多人想聽你對住啲鼓發癲嗰啲所謂藝術。」
G：「Xavier，唔好以為管弦樂好犀利，其實只要肯攞住隻三角鐵敲下，係人都玩得㗎。」
我心裡苦笑…不過睇嚟，Queenie同Gabriel應該感情好好，兩個人一齊玩音樂，只係成日鬥氣，鬥完就可以喺band房扑嘢…不知不覺我又諗起Angel姐姐，只不過佢遇人不淑，但佢好似又無恨過夾band嗰兩條仔，好難理解；而眼前嘅Gabriel哥哥睇落就幾正經，唔知背後係點嘅呢，估計Queenie姐姐又唔似係容易俾人呃嘅人。
呢個時候，有對男女拖住手行緊過嚟，約莫同我差唔多年紀，個女嘅就睡眼惺忪，行到慢吞吞，俾佢條仔拉住嚟行，而條仔就有啲黑面，佢哋幾個都不約而同咁望埋去。
Q’：「Charles，你終於請得郁你個公主女朋友嗱？」由佢開口先就可以知道佢係core成員嚟。
P：「嘻嘻，Queenie姐姐早晨，各位好，小妹係Priscilla，並唔係公主嚟，第一次見面請大家多多指教。」Priscilla著住條純白色荷葉邊吊帶公主短裙，配淡啡色編織帶涼鞋一對，雙褪微曲，一手抽起裙襬，微微向我哋鞠躬問好…呢條女一睇就知道帶住麻煩嘅氣息，不過禮節嘅嘢倒是做得好足下。
加上佢嘅笑容…難以形容，實在係太微妙。
係好甜嘅笑，但甜得嚟係假嘅，係zero可樂！




C：「唔好意思呀，要就人哋所以遲咗少少…」
呢個叫Charles嘅朋友仔，上身著住一件白底心口粗藍間嘅fred perry恤衫，下面淺藍色扯布短褲，再加對睇落係真皮嘅黑色包頭拖鞋。