為了實現媽媽遺願，我成為了女兒國唐僧: 807

Y：「重有，要講個人設畀你聽，你老竇係做工程師，你阿媽係喺同一間公司做會計師，佢哋返工好忙無乜時間理你，如果有無聊人問你佢哋深入啲嘅嘢你話唔知就得，住就…西灣河啦，支吾下佢哋，如果真係要講落去就嘉亨灣啦…」
真好嘢，又係一個寫小說能手，講一句我就住咗喺豪宅度，然而我自己有無去過西灣河都唔係好知，好似以前去石澳嗰陣有經過過…
Y：「咁你同我點識呢，你又無乜嘢叻…就咁啦，你話參加聯校STEM比賽嗰陣識啦，砌下LEGO機械人，寫下簡單動作程式應該難唔到你，跟住你就厚顏無恥咁走嚟識我再追我，記住講到你追得我好辛苦，讚下我添呀…千祈唔好話係我同學。」
好複雜…十足十玩緊RPG特務game咁，不如話我真身係軍情六處嘅占士叉啦，我相信如果俾我㞗吹到天花亂墜都可以嚇死人，如果有人信嘅話…同埋做乜係都要講到我呢啲廢J就唔應該識到妳哋啲女神咁，都唔明妳哋做乜唔報直資中學，重要搵我教非扮妳條仔…
Y：「咁我呢，玩嘅樂器係小提琴，如果講出嚟嘅話記住係violin，我鍾意嘅食物係羊架，我鍾意嘅顏色係橙色，如果有人問我哋啲鹹濕嘢你就話無可奉告，再同我擺返個灰灰哋嘅樣。」
唔使妳講，我而家已經可以灰灰哋…
我：「我都知妳鍾意橙色…」
Y：「總之同我記住呀，我都講到口乾。」
妳隻衰豬，今日完咗，我點都要收返啲車馬費，起碼要同妳一齊玩下R lin，等妳噎噎聲咁叫出嚟。
搭搭下車佢就挨咗埋我身邊瞓，我亦都好順手咁放隻手喺佢大髀上面搭住，佢隻髀都幾白滑下，比起QQ就更加多少少baby fat；已經唔知有幾耐我未試過呢種拍拖嘅感覺，如果要計扮我女朋友嘅話，佢好似飾演得比QQ更加好，諗諗下我都挨返住佢個頭頂瞓著咗。




「兩位，到咗喇。」
真係啱啱瞓著咗就已經到，如果搭九十二號過嚟嘅話應該可以瞓到死死下。
Y：「望住我做乜喎！快啲畀錢啦…」佢捽住眼講。
係喎，我係佢條仔嚟，當然係我負責畀錢，而我銀包入面啲錢就係佢嘅錢嚟…我攞咗張五百蚊紙畀司機，然後佢就找錢…
落咗的士，我哋繼續手拖手行，向住海邊出發；我個心實在係戰戰兢兢，小鹿亂撞，因為完全唔知佢出面啲朋友係乜人嚟。唔好以為我由細到大周街蒲就可以遇神唸經，遇佛打齋，遇仙修道，樓下嗰啲唔係屋邨仔就係死飛仔，而女神嘅朋友應該係另一個層次。
Y：「Queenie！」佢甩咗我隻手衝出去。