為了實現媽媽遺願，我成為了女兒國唐僧: 804

我對住塊鏡，叉住條腰，用手做咗個反V嘅動作。
Y：「拜託…唔好低B啦，咁樣係唔work㗎。」
著住啲咁嘅衫褲，又真係好似有少少興奮劑作用…
我：「咁點樣先work？」
Y：「總之同我意會一下點為之不羈嘅敗家仔。」
我：「我不朽都好不羈㗎啦。」
Y：「我唔係要不羈嘅屋邨仔囉，唔該。」
我：「Well，so what？Off white。」我攤攤雙手。
唔通真係由儉入奢易？好想有好多錢俾我使。
Y：「唔使太做作嘅…喂，攞埋你銀包電話出嚟！」




我：「嗱，又點樣呀？」
Y：「頂你，個殼又殘又污糟，點見人呀…」
我：「咁都係為咗唔好跌爛部機啫，有乜所謂。」
其實我明嘅，無論著得幾光鮮，一俾人見到部咁嘅電話就即刻露饀，繼而身敗名裂。
然之後Yvonne好暴力咁拆咗我個套出嚟，個套邊啲老泥令我覺得有少少慚愧，雖然本來我就無諗住會俾女仔掂我部電話，但我諗都係時候要換過個套，其實係二三十蚊啫。
跟住佢用髮夾㧻咗我張sim卡出嚟，插落另一部機，我完全無諗過佢會做到咁盡。
Y：「呢部係13pro，加埋casetify殼，唔該你同我小心啲用呀下。」再掛埋落我條頸度。
我：「吓…唔要條狗鏈得唔得？好奇怪呀…」
Y：「唔得呀，狗鏈咪啱晒你囉，朝流嘅嘢係咁。」
將部電話掛喺心口，賣旗咁款，我真係識條鐵。




Y：「咦，銀包入面竟然有張五百蚊，估唔到喎。」
我：「咁話晒同女仔出街，都要準備下嘅。」
Y：「得啦，錢嘅嘢我唔會要你難做，呢啲大家都明。」跟手佢攞埋一個紅色銀包出嚟。
我：「使唔使連銀包都換呀…又係off white？」
Y：「呢個唔係，重緊要啲，係LV cross Supreme，我愛嚟炒嘅，你刮花咗嘅話就準備賣身啦。」
唉，搞咁多嘢都唔知為乜，佢只係將我嘅身份證，八達通同銀行卡transfer落去，其他雜物就原封不動，跟手攝咗一大疊五百蚊紙落去。
又未至於好大疊嘅，佢都唔會想撐爛個銀包，大概十零張左右，重係我感受到嘅銀碼嚟。
我：「係咪…妳送錢畀我使呀？」
Y：「唔係呀，你就想！畀你旁身㗎咋，今日完咗之後就要還返畀我。」
我：「講下笑啫…喂，做乜連我鎖匙都攞走埋？！」




Y：「咪玩啦，而家啲高尚屋苑轉晒做密碼鎖同指模鎖㗎喇，重攞住抽鎖匙獻世咩。」
花咗大約十五分鐘，我俾佢裝身完，其實我有啲擔心，以我嘅本事又邊有資格襯得起套嘢，而且一陣又要面對啲唔知乜嘢人，好驚出醜…