為了實現媽媽遺願，我成為了女兒國唐僧: 788

B：「咁我都升中六啦，身邊好多同學都拍過拖，有啲甚至係好普通嘅女仔嚟，所以我咪會諗，其實自己係咪唔係咁好？」
我：「唔會吖，我覺得妳好好呀…」
雖然話係門面說話，但都唔係呃佢嘅，樣就絕對合格，身材高大心口豐滿，體態健康有幹勁，辦事能力應該超卓，我諗佢讀書都唔會太差啦，如果唔係先生都唔會俾佢擔此重任。
B：「咁你話我知嘞，點解從來無男仔追我吖？！個個都剩係諗住friendzone我。」
我：「師姐…妳春心動？好想俾人追咩…」
B：「咁我女仔嚟㗎！都會擔心㗎嘛，點解個個有人追而我無吖，連請人食檸檬都唔得。」
有啲嘢，有又煩，無又煩，男仔又何嘗唔係煩緊點溝女喎，可能好多人鍾意緊妳妳唔知啫。
我：「或者…妳嘅好，暫時唔係咁適用掛…」
B：「乜嘢叫唔係咁適用呀？！」
我只係小小嘅學弟，做乜問埋我呢啲咁深奧嘅問題喎，想諗到我腦袋破瓜咩，於是我吸一大啖氣…




我：「有無聽過，男人不壞，女人不愛？」
B：「有，但你唔好再賣關子，好快啲講喇下。」
我：「其實我哋呢個年紀，又有幾多個係想搵真正嘅愛情喎，好多人都係貪玩嘅啫，對我哋嚟講，可能唔好嘅女仔會更加吸引…有啲本來好嘅特質，無嘅話會更加受歡迎。」
B：「即係…應該要點？！」
我：「嗱，妳唔好嬲我呀，我只係講某部份男仔係咁㗎咋…女仔呢，無腦就好，因為容易氹，無矜持亦都好，因為容易食，無財無勢性格弱小就更好，連大聲嗌唔好都唔識，咁樣男仔就有更多機會。」
B：「哼，咁有乜好，即係話你哋係想蝦我哋咋嘛，我唔好恰所以就無人搵我喇，係咪？」
我：「其中一個原因啦…唔好諗到男仔咁高尚，好多都係咁㗎咋。」
B：「咁阿爽你係咪其中嘅一份子？」
我：「我…唔係太知…唔敢話唔係…」
B：「咁Carmen係咪你所講吸引嘅壞女人？」




我：「呢層…我都唔係幾知，佢應該唔使諗點吸引人，佢可以主動咁玩謝啲仔。」
B：「咁你俾佢玩得好開心啦？」
我：「慾仙慾死，死去活來，咁樣係咪叫開心？」
B：「你即係喺度彈緊我太正經啦。」
我：「又唔係嘅，每個人…都可以有佢嘅選擇。」
B：「好嘢呀你，叫我去幫你實現兄弟嘅夢想，咁邊個嚟幫我實現我嘅夢想？」
我：「欸…或者妳可以走返去同瘟神打茄輪，可能妳可以撻著佢令佢愛上妳嘅。」
B：「先唔要呀！對佢無興趣，佢都唔會對我有意思，條友淨係鍾意女神嘅啫。」
我：「淨計對波嘅話，妳都係超級女神嚟㗎。」
B：「我好想揼扁你呀！死人爽！」